Лінкі ўнівэрсальнага доступу

У Мэксыцы забілі журналіста — пятага за 2017 год


15 траўня ў Мэксыцы быў застрэлены вядомы мясцовы журналіст Хавіер Вальдэс (Javier Valdez), які сапрацоўнічаў з Agence France-Presse. Ён пісаў пра банды наркагандляроў у Мэксыцы. Пра гэта паведамляе AFP.

50-гадовага Хавіера Вальдэса застрэлілі каля рэдакцыі мэксыканскага штотыднёвіка Riodoce, які ён заснаваў у сваім родным горадзе Куліякан (Culiacan) у паўночна-заходнім штаце Сыналёа (Sinaloa).

Вальдэз стаў пятым журналістам, забітым сёлета ў Мэксыцы.

«Быць журналістам — гэта як быць у чорным сьпісе», — сказаў летась Вальдэз на прэзэнтацыі сваёй апошняй кнігі пра наркагрупоўкі.

Прэзыдэнт Энрыке Пэньня Ньета заявіў у «Твітэры», што ён замовіў «расьсьледаваньне гэтага абуральнага злачынства».

Мэксыка займае трэцяе месца ў сьвеце паводле колькасьці забітых журналістаў, саступаючы Сырыі і Аўганістану.

Паводле зьвестак праваабарончай арганізацыі «Рэпартэры бязь межаў», з 2000 году ў Мэксыцы забілі 102 журналістаў.

XS
SM
MD
LG