Лінкі ўнівэрсальнага доступу

Парашэнка: я ведаў ды любіў Шарамета і не задаволены вынікамі расьсьледаваньня забойства


Прэзыдэнт Украіны Пятро Парашэнка заяўляе, што заўтра, 15 траўня, у справе пра забойства журналіста Паўла Шарамета дапытаюць былога супрацоўніка Службы бясьпекі Ўкраіны Ігара Ўсьціменку, на магчымую датычнасьць якога ўказвае незалежнае расьсьледаваньне, зробленае журналістамі праекту «Слідство.Інфо» разам з прадстаўнікамі міжнароднай сеткі OCCRP.

У панядзелак спадар Усьціменка выкліканы на допыт і будзе дапытаны.

«Расьсьледаваньне, якое вядзе Нацыянальная паліцыя і Служба бясьпекі Ўкраіны, будзе максымальна адкрытым для правядзеньня любых сьледчых дзеяньняў. Мяне праінфармавалі, што ў панядзелак спадар Усьціменка выкліканы на допыт і будзе дапытаны. Тое, што можна будзе ведаць сродкам масавай інфармацыі, я ўпэўнены, што вы павінны ведаць», — паведаміў Пятро Парашэннка сёньня на прэсавай канфэрэнцыі ў Кіеве.

Такім чынам, прэзыдэнт Украіны адрэагаваў на тое, што некаторыя журналісты прыйшлі на прэсавую канфэрэнцыю у футболках з надпісам «Хто забіў Паўла?».

«Я ведаў і любіў Паўла. Можна сказаць, што мы зь ім сябравалі. Для мяне, як і для большасьці з вас, была шокам тая тэрарыстычная атака, цынічнае забойства, што адбылося», — сказаў ён.

Я не задаволены, што да гэтага часу ў нас няма забойцы і ён не прыцягнуты да адказнасьці.

Пятро Парашэнка сказаў, што некалькі тыдняў таму сустракаўся з маці і дачкой Паўла Шарамета і распавядаў ім пра хаду расьсьледаваньня
Украінскі прэзыдэнт нагадаў, што адразу пасьля забойства зьвярнуўся па дапамогу да замежных спэцыялістаў. «На жаль, я чакаў большага і лепшага выніку і не задаволены, што да гэтага часу ў нас няма забойцы і ён не прыцягнуты да адказнасьці», — падкрэсьліў ён.

«Я хацеў бы падзякаваць журналістам, якія правялі сваё расьсьледаваньне. Адразу пасьля гэтага патэлефанаваў кіраўніку Нацыянальнай паліцыі і папрасіў, каб ён сустрэўся з журналістамі. Наколькі мне вядома, сустрэча адбылася. Старшыня СБУ далажыў мне, што спадар Усьціменка, які быў згаданы, звольніўся з СБУ ў красавіку 2014 году разам з 2 тысячамі іншых супрацоўнікаў Службы бясьпекі пасьля Рэвалюцыі годнасьці», — сказаў украінскі прэзыдэнт.

Лічыце, што на сёньняшні дзень я разам з вамі ў гэтай самай футболцы.

«Мы павінны аб’яднаць намаганьні, каб расьсьледаваньне было максымальна празрыстае і максымальна эфэктыўнае. Лічыце, што на сёньняшні дзень я разам з вамі ў гэтай самай футболцы», — дадаў Пятро Парашэнка.

Журналісты праекту «Слідство.Інфо» разам з прадстаўнікамі міжнароднай сеткі OCCRP 10 траўня прэзэнтавалі ў Кіеве дакумэнтальны фільм пра забойства журналіста Паўла Шарамета. Аўтары фільма-расьсьледаваньня «Забойства Паўла» заяўляюць, што ім удалося выкрыць дэталі, на якія афіцыйнае сьледзтва не зьвярнула ўвагі.

Лічыце, што на сёньняшні дзень я разам з вамі ў гэтай самай футболцы.

«Ці была гэта некампэтэнтнасьць, непрафэсіяналізм, або сьледчыя Нацыянальнай паліцыі, СБУ і Генпракуратуры банальна перагружаныя працай, справай Шарамета яны займаюцца „пастолькі-паколькі“, ці, магчыма, за гэтым стаіць пэўная палітычная воля, якая блякуе ход справы ў пэўным кірунку, — мы яшчэ ня ведаем», — заявіў Дзьмітро Гнап, адзін з аўтараў фільма.

Журналісты кажуць, што высьветлілі асобаў, якія ў ноч перад забойствам знаходзіліся каля дома, дзе пражываў Павал Шарамет. Паводле вэрсіі аўтараў фільма, гэтыя асобы могуць быць як сьведкамі, так і саўдзельнікамі падзеяў той ночы, аднак праваахоўнікі іх не дапытвалі.

У фільме называюцца імёны высьветленых асобаў, у прыватнасьці Ігара Усьціменкі. Са спасылкай на ўласныя крыніцы журналісты паказваюць на магчымае яго дачыненьне да Службы бясьпекі Ўкраіны.

Магчыма, гэта неяк зьвязана з ФСБ.

«Як мы даведаліся, ён быў супрацоўнікам СБУ паводле стану на 2014 год. Як мы ведаем, у нас тады зьмянілася ўлада. Магчыма, гэта неяк зьвязана з ФСБ (Расеі — рэд.). Мы не змаглі далей дакапацца», — адзначыла Алена Логінава, суаўтарка фільма.

«Ён служыў у Крыме», — дадаў Дзьмітро Гнап.

Пацьверджаньня гэтай інфармацыі зь іншых крыніцаў пакуль няма.

Журналісты адзначаюць, што да выхаду фільма не раскрывалі выяўленых фактаў перад афіцыйным сьледзтвам, аднак зьвярталіся ў СБУ, Генпракуратуру і МУС з просьбай адказаць на пытаньні па справе Шарамета. Некаторыя звароты, па словах аўтараў фільма, засталіся без адказу, некаторыя — атрымалі адмову.

Аўтарамі фільма «Забойства Паўла» зьяўляюцца Ганна Бабінец, Алена Логінава, Дзьмітро Гнап, Улад Лаўроў. Рэжысэрам зьяўляецца амэрыканец Мэт Сарнэцкі.

Беларускі, расейскі і ўкраінскі журналіст Павал Шарамет загінуў 20 ліпеня ў цэнтры Кіева ў выніку выбуху аўтамабіля. Паліцыя кваліфікуе яго сьмерць як наўмыснае забойства, зладжанае спосабам, небясьпечным для жыцьця многіх людзей. Да расьсьледаваньня забойства па просьбе ўкраінскай улады далучылася Фэдэральнае бюро расьсьледаваньняў ЗША.

XS
SM
MD
LG