Лінкі ўнівэрсальнага доступу

ЗША могуць забараніць ноўтбукі на борце для авіярэйсаў з Эўропы


Злучаныя Штаты плянуюць распаўсюдзіць забарону на правоз электроннай тэхнікі ў салёне самалёту на некаторыя краіны Эўропы, паведаміла агенцтва Reuters са спасылкай на чыноўнікаў Міністэрства ўнутранай бясьпекі ЗША.

Пашырэньне забароны можа закрануць трох найбуйнейшых авіяперавозчыкаў ў краіне:

  • United Airlines
  • Delta Air Lines
  • American Airlines Group

Пад забарону трапіць любая электронная тэхніка, акрамя мабільных тэлефонаў і неабходных мэдычных прыбораў.

Прадстаўнік Міністэрства ўнутранай бясьпекі ЗША Дэйв Лапан паведаміў, што сакратар ўнутранай бясьпекі Джон Келі «яшчэ не прыняў канчатковага рашэньня, але [Міністэрства] працягвае ацэньваць магчымыя пагрозы і абмяркоўваць іх з прадстаўнікамі авіякампаній і іншымі зацікаўленымі асобамі».

Амэрыканскія чыноўнікі таксама рыхтуюць плян, каб ў выпадку забароны гарантаваць належную бясьпеку для перавозкі ў багажы вялікай колькасьці прылад з літыевымі батарэямі, каб яны не маглі падарвацца падчас палёту.

Раней эўрапейскія рэгулятары бясьпекі папярэдзілі, што сотні электронных прылад у багажным аддзяленьні на далёкіх пералётах могуць павялічыць рызыку узгараньня літый-іённых акумулятараў.

Сёлета ў сакавіку ў сувязі «з працягам тэрарыстычных пагроз» ЗША ўвялі забарону на правоз электронных прылад — ад электронных кніг да кампутараў і відэакамэр — у ручной паклажы на рэйсах з краін Блізкага Ўсходу і Паўночнай Афрыкі. Буйныя перавозчыкі з гэтага рэгіёну, у тым ліку Emirates паведамілі пра падзеньне попыту на перавозкі з-за абмежаваньняў і адмянілі частку рэйсаў у ЗША.

У Міністэрстве ўнутранай бясьпекі ЗША паведамілі, што меры прыняты ў адказ на інфармацыю пра спробы экстрэмістаў пранесьці на борт выбуховыя прылады, замаскіраваныя пад ноўтбукі, пляншэты, камэры, DVD-плэеры і электронныя гульнявыя прылады.

Вялікабрытанія ўвяла падобныя абмежаваньні сьледам за ЗША.

XS
SM
MD
LG