Расейскі самалёт СУ-27 праляцеў прыкладна за шэсьць мэтраў ад амэрыканскага разьведвальнага самалёта Poseidon над нэўтральнымі водамі Чорнага мора. Пра гэта паведаміў тэлеканал NBC са спасылкай на прэс-сакратарку вайскова-марскіх сілаў ЗША ў Эўропе Памэлу Кунцэ. Інцыдэнт адбыўся 9 мая.
У Міністэрстве абароны Расеі заявілі, што зьнішчальнік Су-30 быў узьняты для перахопу амэрыканскага самалёта-выведніка, які набліжаўся да расійскай мяжы. Расейскі пілёт выканаў манэўр так званага прывітаньня, пасьля чаго амэрыканскі самалёт зьмяніў маршрут, паведамілі ў ведамстве.
Камандаваньне NATO раней заяўляла аб рэзкім павелічэньні актыўнасьці расейскіх вайскова-паветраных сілаў у нэўтральных зонах, асабліва пасьля анэксіі Крыму Расеяй.
Вясной 2016 году расейскі зьнішчальнік выканаў так званую «паветраную бочку» над амэрыканскім выведным самалётам у міжнароднай паветранай прасторы над Балтыйскім морам. Камандаваньне ВМС ЗША тады назвала дзеяньні расейскага пілёта «непрадказальнымі і агрэсіўнымі».
