Сяргей Лаўроў зьяўляецца самым высокапастаўленым расейскім чыноўнікам, які сустрэнецца з Дональдам Трампам ад часу яго ўступленьня на пасаду ў студзені гэтага году.
Перамовы Трампа з Лаўровым, як чакаецца, адбудуцца пасьля таксама заплянаванай на 10 траўня сустрэчы расейскага міністра зь дзяржсакратаром Рэксам Тылерсанам.
Падчас перадвыбарчай кампаніі Трамп абяцаў паляпшэньне адносінаў з Расеяй, але з дня ўступленьня на пасаду зьмяніў рыторыку на больш традыцыйную для рэспубліканцаў. Цяпер Трамп заяўляе пра падтрымку намаганьняў NATO па супрацьдзеяньні ваеннай моцы і агрэсіі Расеі ў Эўропе, ад краінаў Балтыі да Ўкраіны і Грузіі.
Нягледзячы на рознагалосьсі па Сырыі, яна застаецца той праблемай, па якой Расея і чыноўнікі адміністрацыі Трампа дэкляруюць магчымасьць працаваць разам для перамогі над «Ісламскай дзяржавай» і іншымі экстрэмісцкімі групамі.
Лаўроў прыбывае ў Вашынгтон упершыню з 2013 году. Ён вязе расейскі плян спыненьня гвалту ў Сырыі, пасьля таго, як гэта пагадненьне на мінулым тыдні падтрымалі Іран і Турэччына.