Лінкі ўнівэрсальнага доступу

Творчы вечар Міхалка і Brutto пройдзе на хутары «Шаблі»


Сяргей Міхалок на канцэрце Brutto

8 ліпеня на хутары «Шаблі» прадусара Ўладзімера Шаблінскага адбудзецца акустычны канцэрт Brutto. Гурт Сяргея Міхалка пакажа акустычную праграму «Зорачкi».

Паводле задумы арганізатараў, падчас выступу гледачы змогуць пакантактаваць з удзельнікамі калектыву ў нефармальнай абстаноўцы — фармат творчай сустрэчы дасьць магчымасьць наўпрост задаць пытаньні музыкам.

«Такія сустрэчы дазваляюць стварыць асаблівую атмасфэру, якая немагчымая на вялікіх канцэртах. Яны для тых, хто хоча ня толькі ўбачыць і пачуць, але адчуць і нават стаць саўдзельнікам», — перакананыя арганізатары акустычнага канцэрту Brutto.

Сам Сяргей Міхалок маючы адбыцца канцэрт пазначыў як «паэтычна-музычны спэктакаль»:

«Сваімі песьнямі я нікога не вучу. Для мяне гэта проста магчымасьць зафіксавацца эмацыйна ў дадзены пэрыяд, а потым, празь нейкі час, паспрабаваць успомніць, якім я быў раней».

Замест слэму ў глядзельнай залі новая праграма прадугледжвае ціхія нефармальныя зносіны, вершы і апавяданьні, а таксама песьні «Ляпісаў» і Brutto пад гітару.

Гледачы акустычнага канцэрту на хутары «Шаблi» пачуюць новыя аранжыроўкі кампазыцый розных пэрыядаў — «Гары», «Я веру», «Агеньчыкі», «Воіны сьвятла», «Заапарк», «Зорачкі» ды іншых.

Разам зь Міхалком на сцэну выйдуць музыкі Brutto Павал Трацяк і Лэфт.

XS
SM
MD
LG