Па зьвестках ведамства, чалавек, якога клічуць Сяргей, разьлічваў на тое, што кошт акцый «Барусіі» ўпадзе пасьля нападу на футбалістаў. Як паведамляе крыніца Bild, падазраваны мог дыстанцыйна актываваць выбуховае прыстасаваньне з гасьцініцы, у якой спынілася каманда.
Увечары 11 красавіка каля аўтобуса з футбалістамі ўзарваліся тры самаробныя бомбы, начыненыя дробнымі мэталічнымі прадметамі. Пацярпеў абаронца «Барусіі» — гішпанец Марк Бартру.
На наступны дзень у паліцыі заявілі аб затрыманьні падазраванага, як мяркуецца зьвязанага з ісламістамі. Таксама зьявіліся паведамленьні пра знойдзеную ля месца выбуху запіску, у якой гаворыцца, што напад зьдзейсьнены «імем Алаха», і што нямецкія самалёты ў Сірыі забіваюць мусульман.
Пракуратура абвясьціла, што лічыць напад тэрарыстычным.