Лінкі ўнівэрсальнага доступу

Альбанія не змагла выбраць прэзыдэнта ў першым туры: не было кандыдатаў


Архіўнае фота. Прэм'ер-міністар Албаніі Эдзі Рама на выбарчым участку недалёка ад Тыраны падчас мясцовых выбараў, 21 чэрвеня 2015 году

Першы тур выбараў прэзыдэнта Альбаніі, што праходзіць у Народным сходзе (парлямэнце) краіны, агенцтва Reuters назвала «дзіўнымі ня-выбарамі».

19 красавіка першы з магчымых пяці раўндаў выбараў прайшоў без аніводнай пазнакі ў бюлетэнях, бо не было прапанавана аніводнага кандыдата.

Апазыцыйная Дэмакратычная партыя байкатуе выбары і патрабуе найперш прызначыць «тэхнакратычны» ўрад. Іншыя партыі падтрымалі варыянт «ня-выбараў», каб схіліць Дэмакратычную партыю да адмовы ад байкоту. Прэм’ер-міністар Альбаніі, сацыяліст Эдзі Рама заявіў, што будзе чакаць кампрамісу.

Як тлумачыць Balcan Insight, сацыялісты і іхныя саюзьнікі маюць дастаткова галасоў (85 са 140 дэпутатаў парлямэнту), каб выбраць прэзыдэнта, але не выстаўляюць свайго кандыдата, каб дэмакраты пагадзіліся на кампраміснага.

Апазыцыя ж (55 са 140) байкатуе дзейнасьць парлямэнту ад вулічных пратэстаў 18 лютага: яны лічаць, што наступныя парлямэнцкія выбары 18 чэрвеня будуць сфальсыфікаваныя, патрабуюць ад Рамы пакінуць пасаду і «прызначыць урад, які правядзе свабодныя і справядлівыя выбары». А што да прэзыдэнцкіх выбараў, то апазыцыя зацікаўленая ў іх адкладаньні.

Альбанія — парлямэнцкая рэспубліка, але прэзыдэнт фармальна называецца кіраўніком дзяржавы, прызначае прэм’ер-міністра, выступае галоўнакамандуючым войскамі, гарантуе выкананьне законаў і Канстытуцыі.

Кандыдата ў прэзыдэнты прапануюць ня менш за 20 дэпутатаў са 140. У першых трох турах за кандыдата маюць прагаласаваць дзьве траціны парлямэнту (84 дэпутаты), каб ён перамог, а калі гэтага не адбываецца, могуць прызначацца яшчэ два туры, у якіх перамагае кандыдат проста з найбольшай колькасьцю галасоў. Калі і ў пяці турах (яны маюць цягнуцца не даўжэй за 35 дзён разам) прэзыдэнта ня выбралі, парлямэнт распускаецца, прызначаюцца новыя парлямэнцкія выбары.

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG