Лінкі ўнівэрсальнага доступу

Прэзыдэнта Эўрапейскай Рады Туска дапытвалі ў Варшаве 8 гадзін


Дональд Туск

Прэзыдэнт Эўрапейскай Рады Дональд Туск заявіў, што справа, з нагоды якой яго дапытвалі ў вайсковай пракуратуры Польшчы ў якасьці сьведкі некалькі гадзін, «насіла вельмі палітычны характар».

У сераду Туск правёў больш за восем гадзін за зачыненымі дзьвярыма, адказваючы на пытаньні вайсковых пракурораў. Туск сказаў рэпарцёрам, калі выйшаў з пракуратуры, што ня можа даць падрабязных зьвестак пра допыт, зьмест якога зьяўляецца сакрэтным, але адзначыў, што да яго ставіліся гасьцінна.

Прадметам сьледзтва, у якім Туск праходзіць як сведка, зьяўляецца «перавышэньне паўнамоцтваў супрацоўнікамі службы вайсковай контравыведкі праз супрацоўніцтва са спэцслужбамі замежнай дзяржавы без патрэбнай для гэтага згоды прэм’ер-міністра краіны».

Летась польскія СМІ паведамілі, што пракуратура выставіла адпаведныя абвінавачваньні супраць двух былых кіраўнікоў згаданага ведамства. Абвінавачаньні тычацца падзей пэрыяду 2010-2013 гг., калі Туск займаў пасаду прэм’ер-міністра Польшчы. Паводле адной з вэрсій польскіх СМІ, гаворка ідзе аб пагадненьні, быццам бы заключаным паміж польскай вайсковай контравыведкай і ФСБ у рамках апэрацыі па вывадзе польскага вайсковага кантынгенту з Аўганістану праз тэрыторыю Расеі. Супрацоўніцтва адбывалася ў той час, калі Туск быў прэм’ер-міністрам Польшчы.

«Дональд, мы з табой!» і турэмная роба

Дональд Туск лічыцца галоўным палітычным канкурэнтам кіроўнай партыі «Права і справядлівасьць» на прэзыдэнцкіх выбарах у Польшчы ў 2019 годзе.

Як паведамлялася раней, Туск прыбыў у Варшаву на Цэнтральны вакзал, дзе ён быў сустрэты сотнямі прыхільнікаў і праціўнікаў. Некаторыя несьлі плакаты «Дональд, мы з табой!», А апанэнты выкрыквалі абвінавачаньні ў продажы інтарэсаў Польшчы і несьлі пудзіла Туска ў турэмнай робе. Праціўнікі, сярод іншага, вінавацяць Туска ў тым, што ён дазволіў Расеі весьці расьсьледаваньне катастрофы самалёта прэзыдэнта Польшчы ў Смаленску ў красавіку 2010 года і не дамогся вяртаньня абломкаў самалёта.

XS
SM
MD
LG