Расея наклала вэта на рэзалюцыю Рады бясьпекі ААН з асуджэньнем прымяненьня хімічнай зброі рэжымам Башара Асада ў Сырыі.
Паколькі Расея зьяўляецца сталым членам Рады бясьпекі, рэзалюцыя, прапанаваная краінамі Захаду, не прайшла. Гэтая было сёмае вэта Расеі на рэзалюцыю з асуджэньнем дзеяньняў рэжыму Башара Асада ў Сырыі.
Рэзалюцыя патрабавала ад Дамаску даць інфармацыю пра ўсе паветраныя апэрацыі ў дзень інцыдэнту. Дакумэнт, падрыхтаваны заходнімі краінамі, набраў неабходныя для прыняцьця дзесяць галасоў. З-за гэтага прадстаўнік РФ Уладзімір Сафранкоў наклаў вэта.
За рэзалюцыю прагаласавалі 10 членаў Рады бясьпекі, супраць – двое (Расея і Балівія), трое, у тым ліку Кітай, устрымаліся.
Раней у Маскве міністар замежных спраў Расеі Сяргей Лаўроў заявіў на сумеснай з дзяржсакратаром ЗША Рэксам Тылерсанам прэс-канфэрэнцыі, што абедзьве краіны дамовіліся сумесна працаваць над міжнародным расьсьледаваньнем нападу, якое выклікала ў адказ амэрыканскія ракетныя ўдары ў Сырыі.
Аднак Злучаныя Штаты аспрэчваюць, што яны дамовіліся з Расеяй пра неабходнасьць правядзеньня Арганізацыяй Абʼяднаных Нацый расьсьледаваньня нападу з выкарыстаньнем хімічнай зброі ў Сырыі.
Прадстаўнік Тылерсана заявіў, што «пагадненьне не было дасягнутае». ЗША заявілі, што ня маюць патрэбы ў спэцыяльным расьсьледаваньні, паколькі ўжо існуюць мэханізмы для расьсьледаваньня выкарыстаньня хімічнай зброі ў Сырыі.
Расея лічыць, што апазыцыя прэзыдэнту Сырыі Башару Асаду нясе адказнасьць за выкарыстаньне хімічнай зброі. Але ЗША сьцьвярджаюць, што ўсе факты паказваюць на Асада як на вінаватага ў прымяненьні хімічнай зброі.
