«Я ад самага пачатку падкрэсьлівала, што іду рабіць рэформы. Але завяршыць рэформы не змагла. Галоўнае, што зроблена, — забясьпечаная фінансавая стабільнасьць. Спадзяюся, што прэзыдэнт прыме маю адстаўку і прапануе на гэтую пасаду прафэсійнага ды незалежнага ад палітычных уплываў чалавека», — сказала Валерыя Гонтарава сёньня на прэсавай канфэрэнцыі ў Кіеве.
Валерыя Гонтарава падкрэсьліла, што гэтае рашэньне ўхваліла з уласнага жаданьня.
Згодна з украінскім заканадаўствам, Нацыянальны банк Украіны мае за месяц паведамляць пра ўсе зьмены, што адбываюцца ў складзе праўленьня гэтай структуры. Пасьля адстаўкі Валерыі Гонтаравай функцыі кіраўніка НБУ часова будзе выконваць яе першы намесьнік Якаў Смолій. Беларус Дзьмітры Салагуб, як і раней, буде адказваць за манэтарную палітыку на пасадзе намесьніка старшыні НБУ.
Адстаўкі Валерыі Гонтаравай больш за год патрабавала парлямэнцкая апазыцыя — фракцыі «Бацькаўшчына», «Радыкальная партыя» ды «Самапоміч». Яе абвінавачвалі ў супрацоўніцтве з расейскім бізнэсам, у прыватнасьці з банкам ВТБ.
На мінулым тыдні актывісты пікетавалі дом Валерыі Гонтаравай з патрабаваньнямі закрыцьця расейскіх банкаў ва Ўкраіне і ейнай адстаўкі.
