Сьледчы камітэт Расеі назваў імя чалавека, які, верагодна, падарваў сябе ў мэтро Санкт-Пецярбургу 3 красавіка. Тое ж імя называе Дзяржаўны камітэт нацыянальнай бясьпекі Кіргізстану.
Гэта быў 22-гадовы Акбаржон Джалілаў, які нарадзіўся ў Кіргізстане і меў расейскае грамадзянства. Крыміналісты знайшлі ягоныя генэтычныя сьляды на торбе зь першай бомбай, што не падарвалася, а зьвесткі з камэраў назіраньня даюць падставы меркаваць, што ён жа падарваў сябе другой бомбай.
Розныя расейскія СМІ прыводзяць неафіцыйныя зьвесткі пра Джалілава: некалькі гадоў таму пераехаў у Пецярбург да бацькі, які там працаваў і жыў ужо 10 гадоў; працаваў разам з бацькам у аўтамайстэрні, а таксама кухарам; займаўся рукапашным боем, раней не ўчыняў злачынстваў. Паводле некаторых неафіцыйных зьвестак, Джалілаў нібыта быў прыхільнікам забароненай у Расеі экстрэмісцкай арганізацыі, зьвязанай з тэрарыстамі «Ісламскай дзяржавы», а ягоны ідэйны натхняльнік нібы быў у Сырыі на тэрыторыі, захопленай ІД. Маці і брат Джалілава жывуць у Кіргізстане, сьледчыя дапытваюць іх.
У выніку выбуху, які ў Расеі называюць тэрактам, загінулі 14 чалавек. Зь іх ідэнтыфікаваныя 10, іхныя імёны прыводзіць Сьледчы камітэт. Каля паўсотні пацярпелых знаходзяцца ў лякарнях, у іх ліку адзін беларус.
Паводле зьвестак расейскай газэты «Коммерсантъ», расейцаў будуць прымусова зьбіраць на мітынгі супраць тэрарызму 8 красавіка. Пасьля тэракту лідэр праўладнай партыі «Справядлівая Расея» Сяргей Міронаў прапанаваў вярнуць сьмяротнае пакараньне для тэрарыстаў (у Расеі з 1997 году дзейнічае мараторый на сьмяротнае пакараньне), гучаць заклікі палепшыць антытэрарыстычную працу і абяцаньні прыняць «заканадаўчыя захады», што будуць прапанаваныя спэцслужбамі (якія менавіта — не гаворыцца). Тых жа, хто мусіў гарантаваць бясьпеку ў мэтро, могуць абвінаваціць у халатнасьці — злачынца прайшоў незаўважаным праз мэталадэтэктары.
У эфіры расейскага Першага каналу публіцыст Аляксандар Праханаў наўпрост абвінаваціў у сувязі з тэрактам «пятую калёну» і арганізатараў актыкарупцыйных мітынгаў, а на канале «Расея-24» «пятую калёну» абвінавачваюць у тым, што яна «з энтузіязмам адтапталася на трагедыі».