Лінкі ўнівэрсальнага доступу

Трамп: ЗША гатовыя «ў адзіночку» вырашаць праблему Паўночнай Карэі


Прэзыдэнт ЗША Дональд Трамп

Прэзыдэнт ЗША Дональд Трамп заявіў, што калі Кітай ня зоймецца вырашэньнем праблемы Паўночнай Карэі, «гэта зробім мы», перадае «Голас Амэрыкі».

«Кітай мае вялікі ўплыў на Паўночную Карэю», — сказаў Трамп у інтэрвію Financial Times. — І Кітай альбо дапаможа нам з Паўночнай Карэяй, альбо не. У апошнім выпадку нікому ад гэтага карысьці ня будзе«.

У чацьвер Трамп прыме старшыню КНР Сі Цьзіньпіна ў сваім асабняку Мар-а-Лага ў Флорыдзе.

Паўночная Карэя і ейная ядзерная праграма мае стаць адной з галоўных тэмаў двухдзённага саміту. Пагрозы і санкцыі, у тым ліку нядаўняя адмова Кітаю ад імпарту вугалю з Паўночнай Карэі, не змаглі стрымаць імкненьня Пхеньяна стаць ядзернай дзяржавай.

Амэрыканскія экспэрты папярэджваюць, што Паўночная Карэя плянуе шостае ядзернае выпрабаваньне. У лютым Пхеньян зрабіў запуск балістычных ракет у бок Японскага мора, які Токіё назваў «недапушчальным».

Намесьнік дарадцы ў пытаньнях нацыянальнай бясьпекі Кэтлін Макфарлэнд у гутарцы з журналістам Financial Times дапусьціла, што Паўночная Карэя можа здабыць магчымасьць нанесьці ракетны ядзерны ўдар па тэрыторыі ЗША да канца тэрміну паўнамоцтваў адміністрацыі Трампа ў 2021 годзе.

Выступаючы ў праграме «На гэтым тыдні» на тэлеканале АВС у нядзелю, амбасадар ЗША ў ААН Нікі Гэйлі заявіла, што надышоў час, калі Кітай павінен дзейнічаць і спыніць «адгаворкі, што і яны таксама занепакоеныя».

«Яны павінны паказаць нам, наколькі яны занепакоеныя. Ім трэба аказаць ціск на Паўночную Карэю. Адзіная краіна, якая можа спыніць Паўночную Карэю, — гэта Кітай», — заявіла Гэйлі.

Ваенны варыянт не адкідаецца

Белы дом разглядае ўсе варыянты дзеяньняў у дачыненьні да Паўночнай Карэі, у тым ліку ваенны.

Былы міністар абароны ЗША Эштан Картэр, які таксама зьявіўся ў праграме «На гэтым тыдні», заявіў, што ЗША распрацавалі плян прэвэнтыўнага ўдару па паўночнакарэйскім дасьледчым комплексе ў Янбёне яшчэ ў 1994 годзе, калі прэзыдэнтам быў Біл Клінтан.

Картэр сказаў, што ад ваеннага варыянту ніколі нельга адмаўляцца. На думку экс-кіраўніка Пэнтагону, папераджальны ўдар па пляцоўцы пуску ракетаў можа справакаваць уварваньне Паўночнай Карэі ў Паўднёвую Карэю і прывесьці да несумненнай паразы Поўначы.

Аднак, папярэдзіў ён, наступствам такога кроку будзе вайна, спалучаная з «настолькі інтэнсіўным гвалтам, якога мы ня бачылі з часоў апошняй Карэйскай вайны».

«Сэул знаходзіцца проста ля межаў дэмілітарызаванай зоны», — адзначыў ён.

Картэр сказаў, што Поўнач ведае, што ЗША надаюць асаблівую ўвагу стратэгіі стрымліваньня і сілы на Карэйскім паўвостраве. Акрамя таго, паводле яго, Кітай ведае, што крах Паўночнай Карэі прывядзе да стварэньня каля яго межаў абʼяднанай Карэі, саюзьнікам якой будуць ЗША.

XS
SM
MD
LG