Лінкі ўнівэрсальнага доступу

Некалькі соцень чалавек выйшлі на Дзень Волі ў Берасьці. ФОТА


Шэсьце на Дзень Волі ў Берасьці

Некалькі соцень чалавек узялі ўдзел у акцыі на Дзень Волі ў Берасьці. Адбылося шэсьце ды мітынг, інцыдэнтаў з праваахоўнікамі не было.

Акцыя доўжылася дзьве гадзіны. Яе арганізатарамі выступілі кіраўнікі мясцовых палітычных партый Зьміцер Шыманскі (Партыя БНФ), Ігар Маслоўскі (Беларуская сацыял-дэмакратычная партыя Грамада), Уладзімер Вуек (Аб’яднаная грамадзянская партыя), Юры Казакевіч (Руху «За свабоду») і прадстаўнікі шэрагу іншых грамадзкіх арганізацыяў.

Упершыню за 4 гады ўлады дазволілі акцыю апазыцыі менавіта ў цэнтры Берасьця. Удзельнікі зьбіраліся на скрыжаваньні праспэкту Машэрава і бульвару Касманаўтаў. Адтуль рушылі пешаходнай вуліцай Савецкай да плошчы Свабоды.

Падчас шэсьця гучалі традыцыйныя лёзунгі «Жыве Беларусь!», «Не — дэкрэту нумар 3», «Лукашэнка — сыходзь». Пэрыядычна народ пляскаў у ладкі.

У часе шэсьця колькасьць удзельнікаў, паводле розных падлікаў, дасягала 500–700 чалавек.

Пару соцень чалавек узялі ўдзел і ў мітынгу на плошчы Свабоды. У часе мітынгу арганізатары зачыталі падрыхтаваныя рэзалюцыі. Сярод іх — зварот у адміністрацыю прэзыдэнта з патрабаваньнем правядзеньня свабодных і дэмакратычных выбараў, рэзалюцыя супраць дэкрэту № 3, зварот у пракуратуру з пратэстам у сувязі з затрыманьнямі ўдзельнікаў акцый і журналістаў, зварот у Берасьцейскі гарвыканкам з патрабаваньнем вызначыць для мітынгаў і пікетаваньня вуліцу Савецкую і плошчу Свабоды ў Берасьці, а таксама рэзалюцыя аб неабходнасьці стварэньня грамадзкай рады пры старшыні гарвыканкаму.

Акрамя арганізатараў акцыі, далі выступіць і ўсім ахвотным. Людзі выказваліся пра сьвята Дня Волі, пра неабходнасьць адмены дэкрэту № 3, гучалі словы пра запалохваньне народу арыштамі і штрафамі. Апроч дэманстрантаў, да мікрафону выйшаў і старшыня Берасьцейскага гарадзкога савету дэпутатаў Мікалай Красоўскі, які заявіў, што ён не прыхільнік «мітынговага спосабу» сустрэч, ды запрасіў людзей абмяркоўваць праблемы на асабістых прыёмах у чыноўнікаў.

У часе выступу Мікалая Красоўскага гучалі воклічы «Ганьба!», яго пачалі асьвістваць, але арганізатары папрасілі людзей даць яму выказацца.

Зь вядомых асобаў на акцыі ў Берасьці прысутнічалі кандыдат на прэзыдэнта на выбарах 2006 году Аляксандар Мілінкевіч і яго жонка Іна Кулей, а таксама кандыдатка на прэзыдэнта на выбарах 2015 году Тацяна Караткевіч.

Адметнасьцю гэтай акцыі было тое, што на пачатку яе правядзеньня ў цэнтры Берасьця зьнік 3G інтэрнэт ад усіх мабільных апэратараў, таму журналісты не маглі ладзіць жывыя трансьляцыі. У часе мітынгу сваё абурэньне сытуацыяй з інтэрнэтам берасьцейцы выказвалі прысутным на мітынгу чыноўнікам, але тыя казалі, што гэта ня ў іх кампэтэнцыі.

Пасьля акцыі інтэрнэт у цэнтры Берасьця запрацаваў.

У цэлым Дзень Волі ў Берасьці прайшоў мірна, затрыманьняў і інцыдэнтаў зь міліцыяй не было. Увесь час, пакуль ішла акцыя, прысутнічалі міліцыянты ў форме, супрацоўнікі ДАІ суправаджалі шэсьце, непадалёк ад месца мітынгу дзяжурыла машына мэдыкаў.

Папярэдняя санкцыянаваная ўладамі акцыя апазыцыі ў цэнтры Берасьця адбылася 1 траўня 2013 году, калі гарвыканкам дазволіў зладзіць дэманстрацыю сацыял-дэмакратам.

Удзельнікі акцыі пастанавілі сабрацца наступным разам на плошчы Свабоды ў Берасьці 1 траўня, каб абмеркаваць адказы ўладаў на рэзалюцыі мітынгу.

Некалькі соцень чалавек узялі ўдзел у акцыі ў Берасьці
Некалькі соцень чалавек узялі ўдзел у акцыі ў Берасьці

У часе шэсьця ў Берасьці
У часе шэсьця ў Берасьці

Арганізатары акцыі (зьлева направа) Уладзімер Вуек (АГП), Зьміцер Шыманскі (ПБНФ), Ігар Маслоўскі (БСДПГ)
Арганізатары акцыі (зьлева направа) Уладзімер Вуек (АГП), Зьміцер Шыманскі (ПБНФ), Ігар Маслоўскі (БСДПГ)

Удзельнікі мітынгу галасуюць за рэзалюцыі
Удзельнікі мітынгу галасуюць за рэзалюцыі

Удзельніца берасьцейскай акцыі з плякацікам
Удзельніца берасьцейскай акцыі з плякацікам

Некаторыя ўдзельнікі былі зь дзецьмі
Некаторыя ўдзельнікі былі зь дзецьмі

Аляксандар Мілінкевіч і Іна Кулей
Аляксандар Мілінкевіч і Іна Кулей

Тацяна Караткевіч на акцыі ў Берасьці
Тацяна Караткевіч на акцыі ў Берасьці

Шмат хто выступаў супраць дэкрэту №3
Шмат хто выступаў супраць дэкрэту №3

Перад прысутнымі выступіў старшыня Берасьцейскага гарсавету Мікалай Красоўскі
Перад прысутнымі выступіў старшыня Берасьцейскага гарсавету Мікалай Красоўскі

Жанчына з самаробным плякатам
Жанчына з самаробным плякатам

x

Ваша меркаваньне

Паказаць камэнтары

XS
SM
MD
LG