Польская кампанія распрацавала прыбор, які выкарыстоўвае вадкія крышталі, каб выявіць зьмены ў тканках малочнай залозы, што можа значна паскорыць дыягностыку раку грудзей.
Здымак, атрыманы з дапамогай ручной прылады пад назовам Braster, выяўляе плямы ў грудзях, якія могуць паказваць на пухліны на раньняй стадыі. Мэтад заснаваны на выяўленьні анамаліяў, а таксама на вывучэньні зьмен тэмпэратуры тканак на працягу пэўнага часу.
«Найбольш важнай часткай зьяўляецца вадкакрышталічная плёнка, якая выступае ў якасьці тэрмаграфічнага дэтэктара, — патлумачыў Марцін Тржына, кіраўнік дасьледаваньняў і распрацовак кампаніі Braster. — Дзякуючы вадкакрышталічнаму дэтэктару можна фіксаваць любыя зьмены тэмпэратуры ў тканцы малочнай залозы, якія могуць быць індыкатарамі злаякасных пухлін».
Вынікі перадаюцца праз смартфон у тэлемэдычны цэнтар кампаніі, дзе яны аналізуюцца мэдычным пэрсаналам. Поўнае абсьледаваньне, якое можа быць зроблена ў хатніх умовах, займае каля 15 хвілін.
У адрозьненьне ад традыцыйных дыягнастычных прылад, Braster ня мае ўзроставых абмежаваньняў і можа выкарыстоўвацца часьцей, бо не вылучае ніякіх шкодных выпраменьваньняў.
Тэрмаграфія была ўхваленая ў 1982 годзе Ўпраўленьнем кантролю за прадуктамі і лекамі ЗША ў якасьці дадатковага мэтаду дасьледаваньня грудзей у жанчын. Гэты мэтад дазваляе выявіць раньнія анамаліі, яшчэ ня бачныя ў якасьці цалкам сфармаваных марфалягічных пашкоджаньняў, якія можна адрозьніць ад іншых тканак на аснове розьніцы тэмпэратур. У аснове дыягностыкі ляжыць так званы «дэрматэрмічны эфэкт» ад павялічанай хуткасьці мэтабалізму пухлінных клетак у параўнаньні з нармальнымі клеткамі.
Прыбор быў тэставаны ў Ягэлёнскім унівэрсытэце ў Кракаве на 1300 жанчынах у 2013-2016 гадах, у выніку было даказана, што ён карысны ў прадухіленьні раку нароўні з мамаграфіяй.
Калі злаякасная пухліна выяўляецца на раньніх стадыях, шанцы на выжываньне могуць павялічыцца амаль да 100 %.
«Вы не павінны ісьці да лекара, у клініку для праверкі. Вы можаце зрабіць гэта дома, атрымліваючы больш-менш тое ж мэдычнае заключэньне. Такім чынам, вы значна зьнізіце рызыку прапусьціць пухліну, якая расьце ў вашых грудзях», — кажа генэральны дырэктар Braster Марцін Галіцкі, дадаючы, што Braster не замяняе традыцыйныя мэтады дыягностыкі, такія, як мамаграфія, і зьяўляецца дадатковай працэдурай.
Паводле Сусьветнай арганізацыі аховы здароўя, рак малочнай залозы зьяўляецца найбольш сурʼёзным тыпам раку ў жанчын — на яго прыпадае 25,2 % ракавых захворваньняў з 30 %-ым сьмяротным зыходам.
У тых выпадках, калі злаякасная пухліна выяўляецца на раньніх стадыях, шанцы на выжываньне могуць павялічыцца амаль да 100 %, кажуць вытворцы Braster.
