Лінкі ўнівэрсальнага доступу

Дарадца кіраўніка МУС Украіны Антон Герашчанка агучыў імя забойцы былога дэпутата Дзяржаўнай Думы Расеі Дзяніса Вараненкава. Паводле Герашчанкі, Вараненкава застрэліў 28-гадовы грамадзянін Украіны Павал Паршоў, родам з Севастопалю, завэрбаваны расейскімі спэцслужбамі.

«За сваё жыцьцё Павал Паршоў ніводнага разу, ніколі афіцыйна не выяжджаў за мяжу Ўкраіны. Але ў лютым 2015 году ён перасек мяжу Ўкраіны, прайшоўшы пешшу праз адзін з КПП на мяжы з Беларусьсю. У Расеі, дзе ён знаходзіўся перад перакідваньнем ва Ўкраіну, ён прайшоў курс спэцыяльнага навучаньня ў школе для дывэрсантаў, створанай яшчэ ў часы сталінскага НКВД», — паведаміў на сваёй старонцы ў Facebook народны дэпутат Украіны Антон Герашчанка.


Паводле яго, менавіта ў Расеі Паршоў атрымаў заданьне ўкараніцца ў адно з падразьдзяленьняў Узброеных сіл ці Нацыянальнай гвардыі і рабіць выгляд, што ён звычайны жаўнер. «Здаровы, моцны малады чалавек, грамадзянін Украіны, пасьпяхова выканаў задачу расейскіх спэцслужбаў і год праслужыў у адным з падразьдзяленьняў Нацыянальнай гвардыі. У баявых дзеяньнях удзелу ня браў. Звольніўся ў жніўні 2016 году, пасьля чаго чакаў з Масквы каманды дзейнічаць», — удакладніў народны дэпутат.

Антон Герашчанка таксама паведаміў, што ў сувязі з гэтым будуць перагледжаныя крытэрыі праверкі пры прыёме грамадзян на службу ва Ўзброеныя сілы, Нацыянальную гвардыю ды іншыя сілавыя структуры Ўкраіны на прадмет магчымай датычнасьці да працы на спэцслужбы Расеі.

У той жа час на афіцыйным сайце Міністэрства ўнутраных спраў Украіны імя Паўла Пашова ад 2011 году знаходзіцца ў базе асоб, якіх шукаюць за зьдзяйсьненьне злачынства. Паводле гэтай інфармацыі, ён абвінавачваўся ў адмываньні даходаў, атрыманых злачынным шляхам. Крымінальная справа была адкрыта ў Днепрапятроўскай вобласьці.



Дзяніса Вараненкава застрэлілі 23 сакавіка ў цэнтры Кіева, на вуліцы Пушкінскай каля гатэлю «Прэм’ер-палац». Да эміграцыі ва Ўкраіну і атрыманьня ўкраінскага грамадзянства ён прадстаўляў фракцыю Кампартыі Расеі ў Дзяржаўнай Думе Расеі.

Ваша меркаваньне

Паказаць камэнтары

XS
SM
MD
LG