Лінкі ўнівэрсальнага доступу

Мікола Статкевіч, Марына Адамовіч і іх каты ВІДЭА


Падчас відэаінтэрвію Свабодзе былога кандыдата на прэзыдэнта Міколы Статкевіча своеасаблівым героем трансьляцыі стаў кот. «Гэта наша Лолачка вылезла, яна звычайна на акне сядзіць, глядзіць на вуліцу і вельмі любіць увагу», — расказала жонка палітыка Марына Адамовіч.

У Міколы і Марыны ў доме жывуць адна котка і тры каты. «Старэйшы, Бонечка, можа проста залезьці на рукі і хвастом пакруціць перад камэрай», — працягвае Марына Адамовіч.

Катоў забрала з вуліцы Марына. «Як Мікола жартуе, калі людзі даведваюцца, што ў нас чатыры каты, з прыдыханьнем кажуць: „Пародзістыя, напэўна“, Мікола заўсёды адказвае: „Так, з самых элітных сьметніц гораду“. Двое самі прыйшлі кацянятамі малымі, а дваіх мы рэальна забралі са сьметніцы», — згадвае яна.



Пытаюся ў яе, Мікола ўсё ж «кашачнік» ці «сабачнік»?

«Мікола, канечне, сабачнік, але воляй лёсу апынуўшыся ў такім атачэньні, наладзіў свае адносіны и з катамі. Баніфацый, наш старэйшы кот, прызнаў Міколу за галоўнага. Яны пэўны час канкуравалі, спрабавалі змагацца. Мікола раней сьмяяўся: „Як гэта месца пры гаспадыні заняў ты, вялікі, безвалосы кот“. Але потым наладзіліся ў іх адносіны», — згадвае Марына пэрыяд, калі Мікола вярнуўся пасьля амаль пяці гадоў зьняволеньня.



Цікаўлюся, дзе любяць спаць каты?

«Канечне, любы нармальны кот любіць ложак. Праўдамі і няпраўдамі імкнуцца пранікнуць туды. Калі яны яшчэ досьведу ня мелі і па старой звычцы беглі ўвечары ў спальню, клаліся на ложак, чакалі, пакуль я вярнуся. Я прыходзіла і зганяла іх. Таму мудры Баніфацый увечары адразу хаваўся, а потым вылазіў і ўкладваўся ў нагах».

Беларусь між народамі: Каты

Далей мы пераходзім да размовы на больш сурʼёзныя тэмы. Марына лічыць сумным жарт, які пабачыла ў Фэйсбку ў журналіста Зьмітра Галко: «Вярніце ката Дашкевічу». Пасьля ператрусу спэцслужбаў з кватэры Дашкевічаў зьніклі грошы і кот Леапольд.


Што да сытуацыі з бацькоўскім домам Марыны, з рашэньнем уладаў аб яго зносе, жонка Статкевіча аптымізму вялікага ня мае.

«Інтэнсыфікавалі працы побач, ня ведаю, што будуць, калектар ці што, але процьма тэхнікі... Мы расчысьцілі кавалак старога саду, хацелі з восені пасадзіць новы сад...».

Але трывожна Марыне Адамовіч ня толькі з прычыны пагрозы страціць жыльлё.

«Трывожна зараз любому нармальнаму чалавеку. У краіне нагнятаецца гістэрыя, кляпаюцца дзікія справы, калі людзі рэальна сядзяць ужо ў СІЗА КДБ з дзікімі абвінавачваньнямі. „Масавыя беспарадкі“ ізноў пачалі рыхтавацца, і настолькі розных людзей нахапалі, каб стварыць арганізаваную злачынную групоўку».

Былы палітвязень, былы кандыдат на прэзыдэнта Мікола Статкевіч узяў на сябе адказнасьць за правядзеньне Дня Волі. З апошнія некалькі тыдняў у Беларусі затрыманыя некалькі сотняў чалавек, каля 100 чалавек знаходзяцца за кратамі, частка — у СІЗА КДБ.

Пасьля прэзыдэнцкіх выбараў 2010 году Мікола Стакевіч быў асуджаны за арганізацыю «масавых беспарадкаў» да шасьці гадоў пазбаўленьня волі ў калёніі ўзмоцненага рэжыму. У 2012 узнагароджаны прэміяй «За асаблівую палітычную мужнасьць» імя Вілі Бранта. У жніўні 2015 году быў вызвалены з-за кратаў.

  • 16x9 Image

    Ганна Соўсь

    Ганна Соўсь нарадзілася ў Менску. Скончыла факультэт журналістыкі БДУ. Працавала ў незалежнай газэце «Народная воля»(1997-2000). Ад 2000 году працуе на «Свабодзе». Кнігі на «Свабодзе» — «Дарога праз Курапаты» (аўтарка рэпартажаў), «Адзін дзень палітвязьня» (ідэя і ўкладальніца), «Адзін дзень палітвязьня. 2009-2011»(ідэя і ўкладальніца), «Жыцьцё пасьля раку» (аўтарка ідэі і каардынатарка праекту, рэдактарка). Аўтарка праекту «Расея і я», сэрыі інтэрвію з 12 экс-прэзыдэнтамі постсавецкіх кранаў. Сябра БАЖ.

Ваша меркаваньне

Паказаць камэнтары

XS
SM
MD
LG