Ізраіль «неадкладна» зьнішчыць комплексы супрацьпаветранай абароны Сырыі, калі тыя зноў заатакуюць ізраільскія самалёты. Пра гэта заявіў міністар абароны Ізраілю Авігдор Лібэрман.
У ноч на пятніцу, 17 сакавіка, ізраільскія самалёты трапілі пад абстрэл зэнітнымі ракетамі падчас паветранай апэрацыі ў Сырыі. Дамаск сьцьвярджае, што адзін самалёт быў зьбіты, ізраільскія вайскоўцы гэтай інфармацыю не пацьвердзілі.
Як сьцьвярджае ізраільскае камандаваньне, самалёты наносілі ўдары па канвоях са зброяй, якая пастаўляецца ў Лібан для шыіцкай ісламісцкай арганізацыі «Хізбала». Кіраўнік абароннага ведамства Ізраілю адзначыў, што ізраільскія вайскоўцы не зацікаўленыя ва ўмяшаньні ў канфлікт у Сырыі.
СМІ называлі тое, што адбылося, самым сур’ёзным інцыдэнтам паміж Ізраілем і Сырыяй за апошнія некалькі гадоў.