Анархісты прынцыпова не паведамлялі пра акцыю паліцыю, у выніку чаго адбыўся канфлікт з аховай амбасады. Да пікетоўцаў выйшаў беларускі дыплямат, які прадставіўся «саветнікам у пытаньнях бясьпекі» і заявіў, што акцыя «несанкцыяваная».
У адказ пратэстоўцы заявілі, што ва Ўкраіне вулічныя акцыі не патрэбна санкцыянаваць.
«Тут вам не Беларусь. Мы не баімся» — запярэчыў яму адзін з удзельнікаў.
Пасьля гэтага анархісты пачалі задаваць пытаньні наконт затрыманых у Менску. Супрацоўнік амбасады праігнараваў пытаньні і вярнуўся ў будынак, каб выклікаць паліцыю. Аднак да канца акцыі яна так і не прыехала.
Ва Ўкраіне, каб арганізаваць мірную акцыю, непатрэбны дазвол уладаў. Дастаткова заявіць пра яе правядзеньне ў паліцыю альбо гарадзкім уладам.
Анархісты скандавалі «Ўсе рэпрэсіі — дарма» і «Свабоду ўдзельнікам сацыяльнага маршу». Акцыя працягвалася каля 20 хвілінаў.
