Лінкі ўнівэрсальнага доступу

Дэпутатка Анісім: затрыманьні жанчын-журналістак абуральныя


Алена Анісім

14 сакавіка дэпутатка Палаты прадстаўнікоў Алена Анісім адправіла лісты міністру інфармацыі і старшыні Вярхоўнага Суду з нагоды затрыманьняў, арыштаў і штрафаў у дачыненьні да дзясяткаў журналістаў з розных выданьняў.

Алена Анісім піша, што «як былы рэдактар незалежнага выданьня, газэты «Новы час», яна ня можа зразумець сутнасьці правапарушэньняў, у якіх вінавацяць журналістаў:

«Кіраўнік краіны ясна выказаўся за тое, каб жыхары ў розных гарадах мелі права выйсьці на гарадзкія плошчы і свабодна сказаць пра свае праблемы. Журналісты дзейнічалі ў адпаведнасьці са сваімі прафэсійнымі абавязкамі і інфармавалі грамадзкасьць краіны і органы ўлады пра сытуацыю ў розных гарадах. Затрыманьне і прыцягненьне іх да адказнасьці за прафэсійную дзейнасьць у любым выпадку выходзіць за межы заканадаўства. Асабліва абуральным выглядаюць такія факты ў дачыненьні да жанчын-журналістак», — кажа Анісім у звароце да міністаркі інфармацыі Ліліі Ананіч і просіць яе зрабіць захады дзеля абароны пацярпелых журналістаў.

Зьвяртаючыся да старшыні Вярхоўнага Суду Сукалы, Анісім патрабуе адказаць, «на падставе якіх заканадаўчых актаў былі асуджаныя журналісты, якія дзейнічалі ў адпаведнасьці са сваімі прафэсійнымі абавязкамі».

«Прыцягненьне іх да адказнасьці і тым больш судовае пакараньне (у тым ліку значныя грашовыя штрафы) не спрыяе паляпшэньню агульнай сытуацыі ў краіне і шкодзіць міжнароднаму іміджу. Складваецца ўражаньне, што за гэтым рашэньнем стаяць людзі, якія не жадаюць дзейнічаць на карысьць нашай дзяржавы ў адпаведнасьці з распараджэньнем кіраўніка краіны, а перасьледуюць іншыя інтарэсы».

13 сакавіка ў Воршы адбыліся суды над журналісткай Свабоды Галінай Абакунчык ​ і карэспандэнткай тэлеканалу «Белсат» Кацярынай Бахвалавай. Абедзьве былі затрыманыя падчас акцыі пратэсту 12 сакавіка ў Воршы і аштрафаваныя на 25 і 30 базавых велічыняў адпаведна. Усяго 12 сакавіка былі затрыманы 19 журналістаў і блогераў. 13 сакавіка быў асуджаны на 13 сутак адміністратыўнага арышту вядомы гомельскі блогер Максім Філіповіч.

Глядзець камэнтары (4)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG