Лінкі ўнівэрсальнага доступу

Канстытуцыйны суд Паўднёвай Карэі зацьвердзіў імпічмэнт прэзыдэнткі. У пратэстах загінулі два чалавекі


Прэзыдэнтка Паўднёвай Карэі Пак Кын Хе

Канстытуцыйны суд Паўднёвай Карэі пакінуў у сіле рашэньне парлямэнту пра імпічмэнт прэзыдэнткі краіны Пак Кын Хе, перадае Reuters. Гэта першы выпадак, калі законна абраны кіраўнік Паўднёвай Карэі датэрмінова пакідае пасаду. Пак адрынала абвінавачаньні, але завочна: у суд яна не зьявілася.

Пак Кын Хе абавязалі неадкладна пакінуць рэзыдэнцыю прэзыдэнта ў Сэуле. Датэрміновыя выбары новага прэзыдэнта, згодна з Канстытуцыяй, маюць прайсьці цягам 60 дзён.

Пасьля вынясеньня вэрдыкту пад Канстытуцыйным судом сабраліся некалькі соцень прыхільнікаў прэзыдэнткі. Яны спрабавалі прарвацца ў будынак праз атачэньне паліцыі, два пратэстоўцы загінулі ў сутыкненьнях. Адзін стары мужчына памёр у шпіталі з траўмай галавы, абставіны сьмерці другога расьсьледуюцца.

Парлямэнт абвясьціў імпічмэнт 9 сьнежня 2016 году, прэзыдэнтку адхілілі ад дзейнасьці да пацьвярджэньня рашэньня Канстытуцыйным судом. Пак Кын Хе казала да таго, што гатовая пайсьці ў адстаўку ў выпадку рашэньня парлямэнту пра імпічмэнт, але ў выніку чакала рашэньня Канстытуцыйнага суду, ня зьехаўшы з рэзыдэнцыі.

Самаўхіленьне, сэкс і «маральная інваліднасьць»: 15 імпічмэнтаў, якія адбыліся і праваліліся

Рэйтынг Пак Кын Хе абваліўся ў канцы кастрычніка 2016 году пасьля паведамленьняў мясцовых СМІ пра ўплыў сяброўкі прэзыдэнткі на дзяржаўную палітыку. Яна змушала паўднёвакарэйскія карпарацыі ахвяраваць мільёны даляраў падкантрольным ёй фондам. Зь лістапада ў Паўднёвай Карэі праходзілі масавыя акцыі пратэсту з патрабаваньнем адстаўкі прэзыдэнткі.

Тую сяброўку прэзыдэнткі арыштавалі і абвінавацілі ў злоўжываньні ўладай. Некалькі былых памочнікаў прэзыдэнткі былі таксама арыштаваныя паводле абвінавачаньня ў перавышэньні ўлады. Міністра культуры арыштавалі па падазрэньні ў складаньні чорных сьпісаў грамадзян, якія крытыкавалі ўлады.

Пак Кын Хе публічна папрасіла прабачэньня за тое, што адбылося, але сама ня стала пакідаць сваю пасаду.

XS
SM
MD
LG