Лінкі ўнівэрсальнага доступу

Цана нафты ў ЗША звалілася да ўзроўню канца мінулага году


У чацьвер цана нафты, што здабываецца ў Злучаных Штатах, апусьцілася ніжэй за 50 даляраў за барэль упершыню з пачатку сьнежня мінулага году, нягледзячы на спробы буйных вытворцаў за межамі ЗША скараціць аб’ёмы здабычы.

У сераду нафта патаньнела на 5 працэнтаў, у чацьвер цана апусьцілася яшчэ на 2 зь лішнім працэнты. Нафта эталённай маркі Brent таксама стала таньнейшай, але каштуе па-ранейшаму трохі даражэй амэрыканскай, 52 даляры за барэль.

У студзені краіны АПЭК ды іншыя вядучыя вытворцы, якія не ўваходзяць у картэль, паменшылі здабычу, што прывяло спачатку да павышэньня цэнаў. Скачок іх, аднак, дазволіў амэрыканскім здабытчыкам сланцавай нафты зноў запусьціць закансэрваваныя магутнасьці, прычым хутка і з малымі выдаткамі. У выніку аб’ём запасаў здабытай нафты ў ЗША расьце ўжо дзевяць тыдняў запар і на мінулым тыдні дасягнуў рэкорднай велічыні — больш як 528 мільёнаў барэляў.

Як адзначаюць аналітыкі, найбуйнейшаму вытворцу АПЭК, Саудаўскай Арабіі, цяпер трэба будзе вырашыць, ці гатовая яна, скарачаючы здабычу ў мэтах падтрыманьня цэнаў, саступаць сваю долю на рынку амэрыканцам.

Падзеньне цэнаў адбілася на курсах акцый вядучых энэргетычных кампаній ЗША, іх сукупны біржавы індэкс упаў з пачатку гэтага году на 8,5 працэнта. Намаганьні адміністрацыі Трампа аслабіць захады рэгуляваньня нафтавых кампаній могуць прывесьці да далейшага зьніжэньне цэнаў.

XS
SM
MD
LG