Брэсцкая мытня распачала крымінальную справу супраць грамадзяніна Расеі, які спрабаваў уехаць з Польшчы ў Беларусь у памежным пункце «Варшаўскі мост».
Затрыманы меў пры сабе рэвальвэр і 124 патроны.
Як паведамляе Дзяржаўны мытны камітэт, на «чырвоным» калідоры падчас агляду аўтамабіля «Мэрсэдэс-Бенц», які рухаўся зь Нямеччыны і якім кіраваў грамадзянін Расеі, службовыя асобы выявілі сярод асабістых рэчаў кіроўцы 50 патронаў ва ўпакоўцы.
Падчас апытаньня на наяўнасьць абмежаваных і забароненых да перамяшчэньня тавараў кіроўца даў адмоўны адказ.
Аўтамабіль накіравалі ў бокс для надгляду, падчас якога ў чамадане з рэчамі расейца знайшлі рэвальвер Smith & Wesson Combat Second з убудаваным ствалом і сэрыйным нумарам на корпусе. Акрамя таго, у аўтамабілі і вопратцы грамадзяніна выяўлена яшчэ 74 патроны.
Паводле вынікаў балістычнай экспэртызы высьветлена, што пісталет прызначаны для стральбы патронамі, знойдзенымі ў машыне.