Санкцыі ЗША супраць Расеі застануцца ў сіле да поўнага выкананьня Менскіх дамоўленасьцяў, спыненьня агрэсіі і дэакупацыі Данбасу і Крыму, паведаміла Міністэрства замежных справаў Украіны.
Суразмоўцы таксама дамовіліся працаваць над падрыхтоўкай сустрэчы паміж прэзыдэнтамі Украіны і ЗША, гаворыцца ў паведамленьні.
Сам Клімкін пасьля сустрэчы заявіў, што ўкраінскае пытаньне «застаецца фундамэнтальна важным для ЗША».
Міністар не прывёў дэталяў перамоваў, але распавёў, што размаўляў з Тылерсанам пра агрэсію Расеі супраць Украіны, і падкрэсьліў, што ні пра які «абмен» Украіны ў кантэксьце адносінаў новай адміністрацыі ЗША з Расеяй гаворкі не ідзе.
Дзяржаўны дэпартамэнт ЗША пакуль не камэнтаваў сустрэчы Тылерсана і Клімкіна.
