Рада Эўрапейскага зьвязу прыняла пастанову аб узмацненьні пашпартнага кантролю на вонкавых межах Шэнгенскай зоны. Адпаведную заяву апублікавалі на сайце Рады.
Папраўка абавязвае дзяржавы Эўразьвязу праводзіць сыстэматычныя праверкі ў дачыненьні да ўсіх асоб, якія ўяжджаюць і выяжджаюць, у тым ліку тых, хто мае права бязьвізавага праезду, і грамадзян Эўразьвязу. Кантроль будзе ўзмоцнены на наземных пагранічных пунктах, тэрміналах, вакзалах і аэрапортах. Праверкі будуць праводзіцца на прадмет прысутнасьці людзей у Шэнгенскай базе дадзеных (SIS) і базе інфармацыі Інтэрполу аб выкрадзеных і згубленых дакументах.
Пастанова павінна ўступіць у сілу праз 20 дзён пасьля падпісаньня. Папраўкі былі прапанаваны Эўракамісіяй у сьнежні 2015 гаду пасьля ўзмацненьня тэрарыстычнай пагрозы.
