Дапамога маламаёмным і пажылым амэрыканцам з набыцьцём страхоўкі застаецца, але замест субсыдаваньня наўпрост з дзяржаўнага бюджэту, як пры Абаму, рэспубліканцы прапануюць даваць падатковыя льготы пакупнікам страховак і вылучаць штатам дапамогу, якую тыя змогуць траціць адпаведна спэцыфічным патрэбам сваіх жыхароў.
Ключавы пункт цяперашняй сыстэмы — штрафаваньне асобаў, якія адмаўляюцца купляць страхавы поліс, — адмяняецца, але і новая сыстэма захоўвае стымулы для ўсіх грамадзян да куплі страхоўкі.
Рэспубліканскі плян захоўвае два іншыя ключавыя элемэнты Obamacare: маладыя людзі могуць карыстацца страхоўкай сваіх бацькоў да дасягненьня 26 гадоў і страхаўнікам забараняецца адмаўляць у страхаваньні асобам з хранічнымі захворваньнямі.
Спрэчкі ў Палаце прадстаўнікоў наконт рэспубліканскага пакету рэформаў пачнуцца на гэтым тыдні. Ніколі раней у гісторыі ЗША Кангрэс не адмяняў дзейную буйнамаштабную сацыяльную праграму, якая ахоплівае мільёны грамадзян.
