У прэсавым рэлізе арганізацыі паведамляецца:
«Супрацоўнікі МВФ дасягнулі пагадненьня з украінскімі ўладамі згодна з абноўленым Мэмарандумам эканамічнай і фінансавай палітыкі. Гэта адкрывае шлях для разгляду радай дырэктараў трэцяга агляду дамоўленасьці ў рамках мэханізму пашыранага фінансаваньня ў другой палове сакавіка».
Адзначаецца, што Ўкраіне будзе прадстаўлена каля 1 мільярда даляраў.
Міністар фінансаў Украіны Аляксандр Данілюк пацьвердзіў гэтую інфармацыю.
«Гэта зьяўляецца вынікам выкананьня Ўкраінай узгодненай c МВФ праграмы рэформаў і сумеснай узгодненай працы прэзыдэнта, ураду і Нацыянальнага банку», — паведаміў ён у сваім «Фэйсбуку».
Фінансавая дапамога Ўкраіне аказваецца ў рамках чатырохгадовай праграмы падтрымкі ўкраінскай эканомікі, якую фонд запусьціў у 2015 годзе.
Агульная сума, якую плянуюць выдзеліць Украіне, ацэньваецца ў 17,5 мільярдаў даляраў.
На дадзены момант Украіна атрымала каля 6,7 мільярда даляраў. Першы транш складаў 5 мільярдаў, другі — 1,7 мільярда даляраў.