Раённы суд азэрбайджанскага гораду Сураханы прыгаварыў да двух гадоў турмы вядомага азэрбайджанскага блогера Мехмана Гусейнава — за тое, што той нібыта паклёпнічаў на паліцыю.
Гусейнаў сьцьвярджаў, што быў выкрадзены 9 студзеня ў цэнтры Баку асобамі ў цывільным адзеньні, калі ён выйшаў з кавярні і накіроўваўся на сустрэчу з сябрамі. У гэты момант да яго падбеглі некалькі чалавек, запіхнулі ў машыну і на галаву накінулі мяшок:
3 гадзіны пратрымалі тварам уніз зь мяшком на галаве.
«Мяне 3 гадзіны пратрымалі тварам уніз зь мяшком на галаве. Білі, я адчуваў, што з носа ідзе кроў. Я трываў. У мяне не хапала дыханьня. Мяне прыніжалі словамі», - распавядаў пасьля блогер.
У выкраданьні ён абвінаваціў супрацоўнікаў паліцыі.
Паліцыя вылучыла сустрэчныя абвінавачваньні, заявіўшы, што блогер быў затрыманы за напад і праявіў злоснае непадпарадкаваньне законным патрабаваньням работніка паліцыі.
«Паводле чалавека, які вылучыў абвінавачваньні супраць блогера, Мехман закрануў яго плячом. Калі ён запатрабаваў тлумачэньняў, Мехман яго аблаяў. Пасьля гэтага прыбыла паліцыя», — паведаміў падрабязнасьці затрыманьня Гусейнава ягоны адвакат Эльчын Садыгаў.
Суд у студзені аштрафаваў Гусейнава на 200 манатаў (каля 112 даляраў) за непадпарадкаваньне паліцыі. Пасьля гэтага Гусейнаў некаторы час зьбіраў грошы на аплату штрафу. Ён быў нязгодны з рашэньнем суду і меў намер аплаціць штраф як мага больш дробнымі манэткамі. У знак падтрымкі блогера многія яго прыхільнікі прыносілі яму манэты на аплату штрафу.
Калі Гусейнаў заявіў пра катаваньні, якія да яго ўжывалі паліцыянты падчас затрыманьня, супраць яго распачалі яшчэ адну справу — аб паклёпе.
Гусейнаў шырока вядомы ў Азербайджане сваімі выкрывальнымі ролікамі. У апошнія месяцы ён рыхтаваў сэрыю відэарэпартажаў аб карупцыі ў ва ўладзе Азэрбайджану — сярод міністраў, дэпутатаў і алігархаў. Яго відэа былі вельмі папулярныя ў сацсетках.