Лінкі ўнівэрсальнага доступу

Менгарвыканкам: на сёньняшні дзень будаўнічыя работы ля Курапатаў не вядуцца


Менскі гарвыканкам, ілюстрацыйнае фота

Пра гэта паведаміла Свабодзе кіраўніца прэсавай службы Менгарвыканкаму Алена Мохар.

Яна спаслалася на словы намесьніка старшыні Віктара Лапцева, які агучыў афіцыйную пазыцыю гарадзкой выканаўчай улады 2 сакавіка:

«Усе расстрэлы, пахаваньні адбываліся ў лясным масіве на вонкавым боку МКАДа. З мапаў 1933 году, з фотасэсіяў 1941 году відаць, што на месцы цяперашняга будаўніцтва і на прылеглай тэрыторыі ляснога масіву тады не было, гэта значыць пахаваньняў там быць не магло. Не было там і дарогі, па якой перавозілі людзей, яна знаходзілася на ўсходзе ад нас... Меркаваньне, што склалася, быццам бы будаўніцтва ажыцьцяўляецца на месцах расстрэлу, не адпавядае рэчаіснасьці. Таму будаўніцтва ажыцьцяўляецца ў адпаведнасьці з заканадаўствам, не закранаючы памяці ахвяраў і ні ў якім выпадку яе не зьневажаючы».

Тым ня менш сытуацыя на кантролі ў старшыні Менгарвыканкаму Андрэя Шорца, які папрасіў на яе вывучэньне тыдзень. І ў сярэдзіне наступнага тыдня кіраўнік абавязкова выкажа афіцыйную пазыцыю, запэўніла прэсавы сакратар Менгарвыканкаму Алена Мохар.

На пытаньне Свабоды, ці ня можа адбыцца так, што пасьля часовага зацішша забудоўнік зноў разгорне тэхніку і адновіць будаўніцтва, спадарыня Мохар адказала:

«Я не магу несьці адказнасьць за забудоўніка. Цяпер работы там дакладна не вядуцца. Больш камэнтароў пакуль ня будзе».

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG