Лінкі ўнівэрсальнага доступу

Актывіста Аляксандра Кабанава будуць судзіць за брыдкаслоўе


Актывіст АГП Аляксандар Кабанаў (з мэгафонам) у часе “Маршу недармаедаў” 26 лютага ў Берасьці
Актывіст АГП Аляксандар Кабанаў (з мэгафонам) у часе “Маршу недармаедаў” 26 лютага ў Берасьці

Бярозаўскі актывіст Аб’яднанай грамадзянскай партыі Аляксандар Кабанаў цягам дня 2 сакавіка двойчы затрымліваўся міліцыяй. На другі раз яго азнаёмілі з пратаколам за брыдкаслоўе і адвезьлі ў суд.

Аднак у судзе Бярозы апазыцыянэр запатрабаваў даць яму адваката, таму судзьдзя адклаў паседжаньне на тыдзень, да 9 сакавіка.

Аляксандар Кабанаў кажа, што ў мацюках яго зьвінаваціў чалавек, які правакаваў яго раніцай на бойку:

Гэта было ўсё пры супрацоўніках міліцыі.

«У міліцыі мне паказалі справу, дзе напісана, што на мяне пададзеная заява, што я брыдкасловіў. Пасьля гэтага мяне зачынілі ў камэру. Паводле справы, я брыдкасловіў раніцай — гэты чалавек, які мяне правакаваў на бойку, напісаў на мяне заяву. Быццам бы я яго зьневажаў, чапляўся да яго. А насамрэч, я наадварот, зьвяртаўся да супрацоўнікаў міліцыі, каб яны зьвярнулі ўвагу, як той чалавек сябе паводзіць. Гэта было ўсё пры супрацоўніках міліцыі,» — распавёў Аляксандар Кабанаў.

Канфлікт зь невядомым здарыўся ў актывіста раніцай, калі ён выйшаў з хаты, зьбіраючыся ў Івацэвічы, дзе была прызначаная сустрэча з мясцовымі праціўнікамі дэкрэту аб дармаедах.

Як распавёў Аляксандар Кабанаў, да яго падышоў малады чалавек, які запатрабаваў спачатку закурыць, потым пачаў патрабаваць грошай. Кабанаў зьвярнуўся да міліцыянтаў, якія знаходзіліся непадалёку ў машыне. У выніку і таго маладога чалавека, і Кабанава завезьлі ў міліцыю.

Потым актывіста выпусьцілі, але праз пэўны час ізноў забралі, бо чалавек напісаў ня яго заяву.

3-га лютага Аляксандар Кабанаў мусіць ехаць у Берасьце па позьве ў тамтэйшую міліцыю. Ён кажа, што сёньня яму ўручылі новую позву з гэтай датай і выклікаюць за ўдзел у «Маршы недармаедаў» у Берасьці 26 лютага. Раней яго выклікалі на 5 сакавіка — у час, калі ў Берасьці заплянаваны чарговы «Марш недармаедаў».

Актывіст АГП сабраў на Берасьцейшчыне 2500 подпісаў за адмену дэкрэту аб дармаедах.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG