«Гэта праблема, якую неабходна расьсьледаваць і разглядаць», — заявіў былы рэспубліканскі сэнатар Коўтс на слуханьнях у сэнацкім камітэце па выведцы.
73-гадовы Коўтс, які раней сам быў чальцом гэтага камітэту, таксама паабяцаў, што прадставіць поўны доступ да ўсіх дакумэнтаў і іншых матэрыялаў, неабходных для расьсьледаваньня.
Дональд Трамп неаднаразова станоўча адгукаўся пра прэзыдэнта Расеі Ўладзіміра Пуціна, з-за чаго ў некаторых у Вашынгтоне ўзьнікла трывога, што амэрыканскі лідэр можа заняць недастаткова жорсткую пазыцыю ў адносінах з Масквой.
Гаворачы пра гэтыя трывогі ў сваёй уступнай заяве, Коўтс уключыў дзеяньні Расеі, а таксама Кітаю і Паўночнай Карэі ў лік галоўных пагрозаў, зь якімі сутыкаюцца ЗША.
«Я з глыбокай занепакоенасьцю назіраю за напорыстасьцю Расеі ў глябальных пытаньнях, і гэта тое, на што мы павінны рэагаваць з шырока адплюшчанымі вачыма і высокай доляй скептыцызму», — сказаў ён.
