Лінкі ўнівэрсальнага доступу

Жанчына абвінаваціла міліцыянта, што пабіў яе сына, а ў суд паклікалі яе саму


Сьвятлана Палхоўская

У Століне раённы суд завяршыў разгляд справы, фігурантамі якой зьяўляюцца сем’і міліцыянта мясцовага РАУС і непаўналетняга Ўладзіслава Палхоўскага.

Жонка старшага інспэктара столінскага РАУС Вадзіма Прылуцкага Ірына патрабавала спагнаньня 1000 рублёў маральнай шкоды за цялесныя пашкоджаньні, якія нібыта нанёс яе сыну Ўладзіслаў Палхоўскі. Учора судзьдзя пасьля чарговага пасяджэньня вырашыў у задавальненьні позвы Ірыне Прылуцкай адмовіць.

Маці Ўладзіслава Сьвятлана Палхоўская сама выхоўвае сына. У судзе жанчына баранілася таксама безь ніякай дапамогі. Справа, празь якую яна апынулася са сваім сынам у судзе, цягнецца яшчэ зь мінулага году:

«Майго сына абвінавачвалі ў тым, што ён нібыта штурхнуў суседскага хлопчыка з плоту. Ірына Прылуцкая лічыць, што ён тым самым нанёс пашкоджаньні яе сыну, і жадала маральнай кампэнсацыі. Але насамрэч справа зусім іначай выглядае. Сын міліцыянта разам з маім сынам ды іншымі дзецьмі палез праз плот па яблыкі і абдзёр сабе руку. Але свайму бацьку, старшаму інспэктару аховы правапарадку і прафіляктыкі Столінскага РАУС Вадзіму Прылуцкаму, ён сказаў, што яго зачапіў мой сын Уладзіслаў. У адказ на гэта міліцыянт выйшаў з дому, паклікаў майго сына і моцна ўдарыў яго, прычым зьбіваньне адбывалася на вачах у іншых дзяцей. Гэты інцыдэнт адбыўся яшчэ мінулым летам».

Калі Ўладзіслаў распавёў маці пра гэта, Сьвятлана Палхоўская зьвярнулася ў мясцовы РАУС і напісала заяву на дзеяньні міліцыянта. Пры гэтым, паводле родных Сьвятланы Палхоўскай, міліцыянт не адмаўляўся спачатку ад свайго ўчынку, сьведчыў, што раптам страціў над сабою кантроль і зьбіў дзіця. Але ўжо літаральна на наступны дзень ён адмовіўся ад сваіх слоў, а ягоная жонка падала ў суд на Ўладзіслава Палхоўскага.

Столінскі суд адразу ж прыняў да разгляду пазоў жонкі міліцыянта. У той жа час праваахоўнікі так і не завялі на патрабаваньне Сьвятланы Палхоўскай справы ў дачыненьні да міліцыянта за зьбіцьцё непаўналетняга. Сьледчыя да гэтага часу праводзяць праверку, справа знаходзіцца на кантролі ў Берасьці. Сьвятлана Палхоўская кажа, што выглядае, нібыта сьледчыя хочуць спыніць гэтую справу:

«Пасьля таго, як я напісала скаргу на зьбіцьцё майго сына міліцыянтам, сьледчыя дзеяньні практычна не вяліся. У правядзеньні дадатковых экспэртызаў адмаўляюць. Але майго дзевяцігадовага сына дапытваў інспэктар у справах непаўналетніх. Прычым допыт праводзіўся, я лічу, з парушэньнем правоў дзіцяці і заканадаўства: размова з маім сынам вялася пры адсутнасьці як бацькоў, так і сацыяльнага пэдагога. Пасьля гэтага Ўладзіслава паставілі нават на ўлік пры інспэкцыі па справах непаўналетніх».

Сьвятлана Палхоўская мае намер давесьці справу да канца і пакараць міліцыянта.

У сваю чаргу сям’я міліцыянта катэгарычна адмаўляецца ад камэнтароў. Таксама справу не жадаюць камэнтаваць і ў мясцовым РАУС.

Сьледчы камітэт у Берасьці вядзе праверку заявы. Пакуль не завершыцца аналіз, сьледчыя ня хочуць даваць камэнтары.

Ваша меркаваньне

Паказаць камэнтары

XS
SM
MD
LG