Бразылец Патэрсан Франку 17 лютага абараніў у Фэдэральным унівэрсытэце штату Баія магістарскую працу «Кіно ў выгнаньні: пераклад і палітыка ў постсавецкай Беларусі».
Як патлумачыў сам Патэрсан Радыё Свабода, у працы разглядаецца так званы інтэрсэміятычны пераклад — пераклад з аднаго сродку камунікацыі ў іншы. Матэрыялам тут паслужылі армейскія дзёньнікі моладзевага актывіста Франака Вячоркі і зьняты паводле іх фільм «Жыве Беларусь!»
У анатацыі гаворыцца, што «праца прапаноўвае задумацца пра пераклад як інструмэнт палітычнага супраціву ў сьвеце, дзе мэдыя ўсё шчыльней зьвязаныя між сабою».
Патэрсан Франку Коста нарадзіўся 10 лістапада 1987 года ў Салвадоры, штат Баія, Бразылія. Магістар праграмы «Літаратура і культура» філялягічнага інстытуту Фэдэральнага ўнівэрсытэту штату Баія, бакаляр гэтага інстытуту, мастак. Выкладаў расейскую мову ў Фэдэральным унівэрсытэце штату Баія (2013 год).
Беларуска-бразыльская сям’я Вольгі і Патэрсана Франку жыве ў Салвадоры — галоўным горадзе штату Баія на ўсходзе Бразыліі.
