Лінкі ўнівэрсальнага доступу

Сэнатар Маккейн заклікаў Трампа даць Украіне сьмяротнае ўзбраеньне


Джон Маккейн

Сэнатар-рэспубліканец ад Арызоны Джон Маккейн адказаў на пытаньне прэзыдэнта ЗША Дональда Трампа па Крыме і заклікаў даць Украіне сьмяротную зброю. Гэта вынікае зь яго паведамленьня, пакінутага ў сетцы Twitter.

«Так, ён (Барак Абама — рэд.) быў занадта мяккім. Давайце абярэм іншы курс разам: дамо Ўкраіне абароннае сьмяротнае ўзбраеньне і захаваем санкцыі супраць Расеі», — напісаў Маккейн, адказаўшы такім чынам на пытаньне Дональда Трампа ў Twitter пра тое, ці быў яго папярэднік занадта мяккім у дачыненьні да Расеі, калі тая анэксавала ўкраінскі Крым.

Напярэдадні прэс-сакратар Белага дома Шон Спайсэр заявіў, што прэзыдэнт ЗША Дональд Трамп выразна дае знаць, што чакае ад улады Расеі вяртаньня Ўкраіне Крыму і дээскаляцыі гвалту на Данбасе. Сьпікер таксама нагадаў, што пра рашучую пазыцыю Вашынгтона па Ўкраіне, у прыватнасьці, па Крыме, ужо заяўляў раней сталы прадстаўнік ЗША ў ААН Ніккей Хэйлі.

Расея анэксавала ўкраінскі Крым у сакавіку 2014 году. Кіеў і Захад не прызнаюць гэтага і лічаць паўвостраў і ў далейшым ўкраінскай тэрыторыяй.

Украіна і Захад абвінавачваюць Расею ў падтрымцы прарасейскіх сэпаратыстаў на Данбасе. Масква гэтыя абвінавачваньні абвяргае, заяўляючы, што на Данбасе няма расейскіх вайскоўцаў, але ёсьць «добраахвотнікі».

Праз агрэсію Расеі супраць Украіны Захад увёў шэраг санкцыяў супраць Масквы.

Ваша меркаваньне

Паказаць камэнтары

XS
SM
MD
LG