Лінкі ўнівэрсальнага доступу

Чыноўнікі з Акцябрскага мяняюць паказаньні ў справе пра «хуліганства» грамадзкай актывісткі


Алена Луцковіч (архіўнае фота)

15 лютага Акцябрскі раённы суд на Гомельшчыне заслухаў тлумачэньні чатырох чыноўнікаў мясцовага райвыканкаму, якія абвінавацілі актывістку Аб’яднанай грамадзянскай партыі, былую дэпутатку парлямэнту Алену Луцковіч у дробным хуліганстве. Тая разам з блогерам Андрэем Павуком 17 студзеня спрабавала высьветліць меркаваньне чыноўнікаў, наколькі выбары ў Беларусі сумленныя й справядлівыя. Луцковіч з мікрафонам задавала пытаньні, а Павук — здымаў на відэа.

Усе яны, па сутнасьці, супярэчылі таму, што было напісана ў заявах ў міліцыю.

«Самым цікавым у тлумачэньнях чыноўнікам было тое, — кажа Алена Луцковіч,— што ўсе яны, па сутнасьці, супярэчылі таму, што было напісана ў заявах ў міліцыю пра маё „хуліганства“. І што я дарогу ім перагароджвала, і на працу не пускала. Нават самы пільны чыноўнік, намесьнік начальніка ідэалягічнай працы, культуры і ў справах моладзі райвыканкаму Сяргей Зарычны, які й патэлефанаваў у міліцыю, што я „прыстаю“ да чыноўнікаў з непрыемнымі пытаньнямі, і той прызнаўся, што згледзеў маё „хуліганства“ не ідучы на працу, а стоячы каля вакна ў кабінэце».

Апрача «сыгналу» Сяргея Зарычнага, у міліцыю паступілі заявы начальніцы аддзелу арганізацыйна-кадравай работы райвыканкаму Тацяны Семянец, начальніцы ўпраўленьня працы, занятасьці і сацыяльнай абароны насельніцтва Тацяны Габінетавай, галоўнай спэцыялісткі аддзелу архітэктуры і будаўніцтва Ірыны Дулуб.

Менскі адвакат Дзьмітры Лепратор, які абараняе Алену Луцковіч, пацікавіўся у Тацяны Габінетавай, на які час затрымалі яе па шляху на працу Луцковіч і Павук?

«Хвіліны на дзьве» — адказвала начальніца.

«А на відэа ваша з Луцковіч сустрэча цягнулася чатыры сэкунды», — заўважыў адвакат.

Габінетава патлумачыла суду, што яна моцна расхвалявалася, і ёй давялося прымаць таблетку.

«Дык вы хочаце пра’явіць Луцковіч матэрыяльныя прэтэнзіі? — пацікавіўся адвакат.

«Не-не», — запэўніла суд Габінетава.

Адміністрацыйную справу пра «хуліганства» актывісткі Луцковіч разглядае старшыня суду Акцябрскага раёну Людміла Гармаш. Суд будзе працягнуты 17 лютага.

XS
SM
MD
LG