Зводны брат лідэра Паўночнай Карэі Кім Чэн Ына быў забіты ў панядзелак раніцай у Малайзіі, паведамляюць паўднёвакарэйскія СМІ са спасылкай на неназваныя крыніцы.
Кабэльнае тэлебачаньне TV Chosun паведамляе, што брат Кім Чэн Ына — Кім Чэн Нам — быў атручаны ў аэрапорце Куала-Лумпуру дзьвюма жанчынамі, якія, як мяркуецца, былі агенткамі паўночнакарэйскіх спэцслужбаў.
Паліцыя Малайзіі паведаміла агенцтву Ройтэрз, што неапазнаны чалавек з Паўночнай Карэі памёр па дарозе ў шпіталь з аэрапорту. Паводле паліцыі, асоба чалавека не ідэнтыфікаваная.
Кім Чэн Нам зьнік з КНДР пасьля сьмяротнага пакараньня свайго дзядзькі. Паводле СМІ, ён хаваўся ў Малайзіі. Пасля прыходу да ўлады ягонага малодшага зводнага брата, Кім Чэн Нам дазваляў сабе крытыкаваць дзейнасьць сваяка.
