Віцэ-прэзыдэнт ЗША Майк Пэнс не выключае паслабленьня ці поўнай адмены санкцый у дачыненьні да Расеі. Пра гэта ён сказаў у праграме амэрыканскага тэлеканала ABC News.
«Пытаньне санкцыяў залежыць ад таго, ці ўбачым мы якія-небудзь зьмены ў пазыцыі Расеі і магчымасьць працаваць на агульныя інтарэсы, а менавіта барацьбу з «Ісламскай дзяржавай», — сказаў Пэнс.
Паводле яго, рашэньне будзе прынятае «цягам бліжэйшых месяцаў».
«У нас з Расеяй агульны інтарэс у супрацьстаяньні радыкальнаму ісламскаму тэрарызму, асабліва „Ісламскай дзяржаве“, і калі мы маем магчымасьць працаваць разам, я думаю, што прэзыдэнт шукае магчымасьці пачаць адносіны зноў», — дадаў ён.
Пры гэтым віцэ-прэзыдэнт ЗША адзначыў, што ў Белым доме актыўна назіраюць за разьвіцьцём сытуацыі на ўсходзе Ўкраіны.
«Мы вельмі занепакоеныя актывізацыяй баявых дзеяньняў», — сказаў Пэнс.
