Першая кніга Віктара Саяпіна была прысьвечаная гісторыі Гарадзенскай мытні і выйшла ў двух тамах. Аўтар адпрацаваў 25 гадоў у мытнай службе: прайшоў шлях ад інспэктара да намесьніка начальніка Гарадзенскай рэгіянальнай мытні. Актыўна займаўся краязнаўствам, працаваў у архівах, а выдаваць кнігі пачаў ужо ў пэнсійным узросьце.
Паводле гарадзенскага гісторыка Андрэя Вашкевіча, Віктар Саяпін падняў вялікі пласт гісторыі. Ён пісаў пра даваенную і пасьляваенную Горадню, цікавіўся Горадняй ХІХ стагодзьдзя, мог напісаць тэкст на любую тэму, пра што яго прасілі гісторыкі. Вельмі шмат працаваў у архівах і любіў гэта рабіць.
«Усе ягоныя кнігі прысьвечаныя гісторыі гарадзенскай штодзённасьці ХІХ-ХХ стагодзьдзя, — зазначае гісторык Вашкевіч. — Але і ня толькі штодзённасьці, бо ён напісаў шмат і пра архітэктуру, і дапоўніў біяграфію гарадзенскіх вуліцаў, выдаваў кнігі пра гарадзенскія храмы, пра кінатэатры і прадпрыемствы...»
Паводле Вашкевіча, яшчэ доўгі час кнігі Віктара Саяпіна будуць перавыдавацца, а таксама ў новых кнігах будуць зьмешчаныя матэрыялы, знойдзеныя краязнаўцам у архівах.
