Лінкі ўнівэрсальнага доступу

«Гомелькабель» адпраўляе грамадзкага актывіста ў шэрагі «дармаедаў»


 Анатоль Паплаўны
Анатоль Паплаўны

Грамадзкі актывіст з Гомелю Анатоль Паплаўны атрымаў паведамленьне з подпісам дырэктара ААТ «Гомелькабель» Сяргея Кузьмянкова, што зь ім ня будзе працягнуты працоўны кантракт. Апошні дзень працы — 5 красавіка.

Анатоль Паплаўны — сьлесар-інструмэнтальшчык найвышэйшай кваліфікацыі, на заводзе ён працаваў тры гады. Ні заўваг, ні спагнаньняў за гэты час ня меў.

«Прыкра тое, — кажа Анатоль, — што звальняюць мяне за 16 дзён да таго часу, калі, паводле заканадаўства, звальняць наагул будзе нельга: 21 красавіка мне споўніцца 59 гадоў, як той казаў, пэнсія на гарызонце. А прэзыдэнцкі дэкрэт № 29 забараняе звальняць работніка, калі яму да пэнсіі застаецца два гады. Думаю, што спрацавала тэлефоннае права, і ад мяне пазбаўляюцца найперш як ад грамадзкага актывіста. Калегі пераказвалі, што начальнік цэху нібыта нават хадзіў да галоўнага інжынэра і прасіў пакінуць мяне на працы».

Анатоль Паплаўны зьяўляецца рэгіянальным прадстаўніком праваабарончага цэнтру «Вясна», раней ачольваў гарадзкую арганізацыю Беларускага народнага фронту. За апазыцыйныя акцыі й пікеты атрымліваў штрафы і сядзеў на сутках.

На леташніх парлямэнцкіх выбарах Паплаўны быў доўгатэрміновым назіральнікам ад апазыцыі ў Гомельскай-Сяльмашаўскай акрузе, напісаў шэраг заўваг пра арганізацыю выбараў і падлік галасоў.

Гэта ўжо трэцяе звальненьне Паплаўнага. Раней з Анатолем раптоўна спынялі кантракты на заводзе пускавых рухавікоў і на прадпрыемстве «Віпра».

«Калі гэтым разам я атрымаў паведамленьне наконт непадаўжэньня кантракту, — дадае Паплаўны, — то адразу напісаў заяву на выхад з афіцыйнага прафсаюзу. Забараніў ужо са студзеня вылічваць з майго заробку прафсаюзныя ўнёскі, паколькі прафсаюзная арганізацыя ня ў стане паўнавартасна абараняць інтарэсы сваіх чальцоў. Заяву ў афіцыйны прафсаюз давялося напісаць у свой час таму, што гэта было абумоўлена прыёмам на працу, якой у красавіку мяне пазбаўляюць».

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG