Барак Абама заявіў, што ўрад Расеі ды іншыя людзі і арганізацыі, ахопленыя санкцыямі, «падрываюць дэмакратычныя працэсы і інстытуты ва Ўкраіне», іхняе «ўжываньне сілы ва Ўкраіне пагражае бясьпецы, стабільнасьці, сувэрэнітэту і тэрытарыяльнай цэласнасьці гэтай краіны».
З-за пагрозы для Ўкраіны, Абама заявіў, што дзеяньні Расеі «ўяўляюць незвычайную і надзвычайную пагрозу для нацыянальнай бясьпекі і зьнешняй палітыкі Злучаных Штатаў».
Абраны прэзыдэнт Дональд Трамп сказаў у інтэрвію газэце The Wall Street Journal, якое было апублікаванае ў пятніцу ўвечары, пра тое, што санкцыі супраць расейскіх грамадзян і кампаніяў, уведзеныя адміністрацыяй Барака Абамы, будуць захаваныя, «прынамсі, на некаторы час».
Аднак ён не выключае іх адмены ў будучыні. «Калі вы ладзіце, і Расея рэальна дапамагае нам, навошта захоўваць санкцыі, калі хтосьці робіць выдатную справу?» — задаецца пытаньнем Трамп.
Як піша газэта, абраны прэзыдэнт выказаў здагадку, што ён можа адмяніць санкцыі, уведзеныя прэзыдэнтам Абамам у сьнежні ў адказ на расейскія кібэратакі падчас прэзыдэнцкай кампаніі, калі Расея акажа сур’ёзную дапамогу ў барацьбе з тэрарызмам і ў дасягненьні іншых мэтаў, важных для Злучаных Штатаў. Дональд Трамп заявіў пра намер сустрэцца з прэзыдэнтам Пуціным празь некаторы час пасьля ўступленьня на пасаду прэзыдэнта ЗША.
