Як паведамілі Радыё Свабода ў адміністрацыі Дзяржаўнай памежнай службы Ўкраіны, пры афармленьні грузавіка, якім кіраваў грамадзянін Рэспублікі Беларусь у памежнікаў узьніклі падазрэньні наконт легітымнасьці адпраўніка і атрымальніка 1240 скрыняў цыгарэт.
У часе паглыбленага агляду грузу выявілася, што цыгарэты ня мелі марак акцызнага збору і ўтрымлівалі прыкметы незаконнага вырабу і падробкі ўпакоўкі.
«У ходзе вывучэньня таварна-суправаджальных дакумэнтаў таксама паўсталі сумневы ў іх сапраўднасьці, бо дадзеныя пра прадпрыемства-адпраўніка мелі прыкметы фіктыўнасьці», — зазначылі ўкраінскія памежнікі.
Паводле гэтага факту пачалося дасудовае расьсьледаваньне, а транспартны сродак з тытунёвымі вырабамі, коштам больш за 180 тысяч даляраў, затрыманы і канфіскаваны.
Папярэдне гэтую падзею кваліфікуюць паводле артыкулу 204 Крымінальнага кодэксу Ўкраіны пра незаконны выраб, захоўваньне, збыт або транспарціроўку з мэтай збыту падакцызных тавараў.
