Паводле Захарэвіча, позву ў Сьвіслацкі раённы суд яму ў Менск прывезьлі міліцыянты. Разгляд справы быў прызначаны на 30 сьнежня, але Захарэвіч у суд не паехаў.
— Ды які сэнс быў туды ехаць, калі рашэньне было вядомае заранёў? Да мяне асудзілі ўжо больш за дзесяць чалавек. Вінаватым я сябе не лічу, паколькі ніякіх законаў не парушаў, а падчас ушанаваньня памяці нацыянальных герояў чытаў свае вершы.
Захарэвіч кажа, што хоць і ня лічыць сябе вінаватым, але ня будзе абскарджваць рашэньне суду.
— Гэта лішняя трата часу і сродкаў. І так відавочна, што рэжым не зьмяніў свайго стаўленьня да тых, хто ля помнікаў нацыянальным героям чытае вершы. Іх судзяць ня толькі ў Сьвіслачы, але і ў іншых гарадах.
Паводле праваабаронцаў, за ўшанаваньне паўстанцаў Каліноўскага ў Сьвіслачы былі асуджаныя чатырнаццаць актывістаў з розных гарадоў Беларусі. Пятнаццатым стаў Зьміцер Захарэвіч зь Менску.
На 30 сьнежня ў Сьвіслачы былі прызначаныя працэсы, акрамя як над Зьмітром Захарэвічам, яшчэ над сустаршынём руху салідарнасьці «Разам» Алесем Макаевым і старшынём Партыі БНФ Аляксеем Янукевічам. Але ні Макаева, ні Янукевіча таксама на судах у Сьвіслачы не было, і рашэньняў суду яны пакуль не атрымалі.
