Пракуратура ў Элку, 60-тысячным горадзе ў паўночна-усходняй Польшчы, абвінаваціла грамадзяніна Тунісу ў забойстве 21-гадовага мясцовага жыхара.
21-гадовы Данель (прозьвішча польскія СМІ не падаюць) памёр, як мяркуюць сьледчыя, ад раненьняў нажом, якія ён атрымаў у навагоднюю ноч падчас спрэчкі перад кебаб-барам у Элку.
Паліцыя затрымала пасьля інцыдэнту чатырох мужчын. Польскае прэсавае агенцтва ПАП паведамляе, што галоўны падазраваны ў злачынстве мае туніскае грамадзянства; разам зь ім былі затрыманыя грамадзяне Альжыру і Марока.
Учора вечарам перад кебаб-барам, дзе мела месца згаданае забойства, сабраліся некалькі сотняў жыхароў Элку, каб выказаць пратэст супраць трагедыі і запаліць зьнічы. Як паведаміла агенцтва ПАП, у зборышчы былі «агрэсіўныя асобы», якія пачалі разьбіваць вокны ў бары ды кідаць пэтарды і камяні ў бок паліцыі. Сутычкі пратэстоўцаў з паліцыяй трывалі да поўначы. Паліцыя затрымала каля 30 чалавек, каб вярнуць парадак у горадзе.
