Як адзначаецца ў заяве МЗС, расейскае кіраўніцтва «працягвае ганебную практыку выкарыстаньня грамадзян Украіны як закладнікаў сваёй агрэсіўнай палітыкі супраць нашай дзяржавы».
Кіеў сьцьвярджае, што Расея працягвае ігнараваць узятыя на сябе абавязацельствы ў рамках менскіх дамоўленасьцяў па абмене закладнікаў і асобаў, якія незаконна ўтрымліваюцца расейцамі.
«Цяпер нам вядома пра палітычна матываванае ўтрыманьне на тэрыторыі дзяржавы-акупанта ня менш за 17 украінцаў. Яшчэ больш нашых суайчыньнікаў беспадстаўна затрыманыя і арыштаваныя на акупаваным Крымскім паўвостраве. Больш за 100 украінцаў у жудасных умовах утрымліваюцца расейска-тэрарыстычнымі сіламі ў акупаваных раёнах Данецкай і Луганскай абласьцей», — кажуць у МЗС Украіны.
«МЗС Украіны патрабуе ад Расейскай Фэдэрацыі неадкладна і безь якіх-небудзь дадатковых умоваў вызваліць усіх грамадзянаў Украіны, якія незаконна ўтрымліваюцца, спыніць практыку палітычнага перасьледу і рэпрэсіяў у дачыненьні да нашых суайчыньнікаў», — адзначаецца ў заяве.