Лінкі ўнівэрсальнага доступу

Гараскоп Свабоды: Паэт Андрэй Хадановіч піша пра надзеі і прагнозы на 2017 год


Андрэй Хадановіч

Беларусы робяць свае прагнозы і складаюць гараскоп надзеяў на наступны год.

Вадаліў - Андрэй Хадановіч, паэт, перакладнік

Кажуць, прадказаньні — рэч няўдзячная,
пагатоў у вечар на Каляды...
Дармаедам ежа будзе смачная,
невукі пашыраць далягляды.

Шмат шчасьлівых зробяцца багатымі,
шмат багатых зробяцца шчасьлівымі.
Вадалівам — сябраваць з Блізьнятамі,
Рыбам — не сварыцца з Вадалівамі.

Панна — у грамадзтве запануе,
скорыць кансэрватараў-байцоў.
Рáку лепей абмінуць піўную.
Фэстываль адбудзецца ў Стральцоў.

Ворага свабоднае краіны
будуць мучыць сны пра Беларусь,
а крывіч адкажа, як павінны,
нечаканай рыфмай «ганарусь».

Гáдам стане сорамна, што гáды.
Зь лібэралам вып’е патрыёт.
На Каляды — здарацца Каляды!
Новы год — настане ў Новы год!

XS
SM
MD
LG