Лінкі ўнівэрсальнага доступу

Беларуская АЭС: пашкоджаньняў корпусу рэактара не знайшлі


Градзірні астравецкай АЭС

29 сьнежня зроблены агляд усіх элемэнтаў корпусу рэактара, які напярэдадні быў дастаўлены на будаўнічую пляцоўку АЭС. Пра гэта паведамляецца на сайце Беларускай АЭС.

У аглядзе рэактара бралі ўдзел прадстаўнікі генэральнага канструктара, завода-вытворцы, Беларускай чыгункі, кампаніі-перавозчыка, страхавой кампаніі, замоўцы і генпадрадчыка.

«Для агляду бурта апорнага быў зьняты ахоўны кажух. У выніку агляду ніякіх пашкоджаньняў не выяўлена», — гаворыцца ў паведамленьні.

26 сьнежня падчас перавозкі корпусу рэактара для Беларускай АЭС на станцыі «Слаўнае» Беларускай чыгункі адбыўся «нязначны дотык мэталічнага транспартнага кажуха, які абараняе бурт апорны корпусу рэактара, з полай жалезабэтоннай апорай кантактнай сеткі». Пры гэтым хуткасьць руху саставу складала каля 3 км у гадзіну.

У чацьвер амбасадару Беларусі ў Вільні Аляксандру Каралю была ўручаная нота з просьбай у тэрміновым парадку даць вычарпальную інфармацыю пра яшчэ адзін інцыдэнт з корпусам рэактара астравецкай атамнай электрастанцыі, паведаміла Міністэрства замежных спраў Літвы.

У дакумэнце МЗС просіць дбайна расьсьледаваць гэты інцыдэнт і праінфармаваць Літву, суседнія дзяржавы і Міжнароднае агенцтва атамнай энэргетыкі (МАГАТЭ) аб выніках расьсьледаваньня. У ноце выказваецца вялікая заклапочанасьць у сувязі з паўторам інцыдэнтаў на АЭС, пра якія Літва даведалася не з афіцыйных крыніц Беларусі, а са СМІ.

27 сьнежня прадстаўнікі Беларускай антыядзернай кампаніі выступілі з адмысловаю заяваю з нагоды чарговай няштатнай сытуацыі на БелАЭС. Яны лічаць неабходным цалкам спыніць будаўніцтва БелАЭС і правесьці комплекснае расьсьледаваньне парушэньняў.

XS
SM
MD
LG