У швайцарскім горадзе Цюрых тры чалавекі былі параненыя, калі невядомы пачаў страляніну каля ісламскага цэнтру непадалёк ад галоўнага чыгуначнага вакзалу ў панядзелак увечары. Пазьней непадалёк ад месца страляніны знайшлі мёртвае цела, паведаміла агентва Reuters.
Паводле мясцовай прэсы, паліцыя ачапіла месца нападу і шукае нападніка. Агенцтва Associated Press паведаміла са спасылкай на паліцыю, што нападнік — мужчына ва ўзросьце каля 30 гадоў.
Стан параненых застаецца невядомы.
Як паведамляе Reuters, ісламскі цэнтар, каля якога была страляніна, зарэгістраваны як установа, дзе мусульмане могуць выконваць свае рэлігійныя абрады і вывучаць ісламскія вераваньні. Таксама тут праводзяцца навуковыя сэмінары.
У Швайцарыі дзьве траціны 8,3 мільённага насельніцтва ідэнтыфікуюць сябе як хрысьціяне, але колькасьць тых, хто спавядае іслам, узрасла да 5 працэнтаў, у тым ліку ў выніку эміграцыі з былой Югаславіі.
У 2009 годзе на рэфэрэндуме была падтрыманая канстытуцыйная забарона на будаўніцтва новых мінарэтаў.
Паводле Reuters, Фэдэрацыя ісламскіх арганізацый у Швайцарыі заявіла, што цэнтар, каля якога адбылася страляніна, ня быў яе членам і яна ня мае зьвестак пра тое, што здарылася.
