Фэдэральны судзьдзя ЗША 12 сьнежня заблякаваў запыт на пералік галасоў на прэзыдэнцкіх выбарах у штаце Пенсыльванія — адным з трох ключавых штатаў, якія абраны прэзыдэнтам Дональд Трамп выйграў невялікай большасьцю.
Лідэрка Партыі зялёных і кандыдатка на прэзыдэнцкіх выбарах Джыл Стайн дамагалася надзвычайнай пастановы Фэдэральнага суду аб пераліку галасоў у Пэнсыльваніі пасьля таго, як суд штату 3 сьнежня адхіліў яе пазоў, паколькі яе прадстаўнікі не змаглі ўнесьці 1 мільён долараў закладу.
Стайн сьцьвярджала, што парушэньні і ўзлом сканавальных прылад ставяць пад пытаньне афіцыйныя вынікі галасаваньня. Стайн таксама запатрабавала пераліку галасоў у штатах Мічыган і Вісконсін. Вынікі пераліку галасоў у штаце Вісконсін, як чакаецца, будуць абвешчаныя пазьней 12 сьнежня паводле часу ў ЗША.
Каб кандыдатка ад дэмакратаў Гілары Клінтан апярэдзіла Трампа ў калегіі выбарнікаў, якая вызначае, хто абраны на прэзыдэнцкую пасаду ў ЗША, яна павінна была стаць пераможцам ва ўсіх трох вышэйназваных штатах.