У Кіргізстане прадстаўнікі ўлады заяўляюць, што выбарнікі пераважнай большасьцю галасоў падтрымалі ўнясеньне зьменаў у Канстытуцыю краіны, якія прадугледжваюць забарону аднаполых шлюбаў, а таксама перадачу часткі паўнамоцтваў прэзыдэнта прэм’ер-міністру.
Цэнтральная выбарчая камісія паведаміла, што 80 працэнтаў выбарнікаў падтрымалі захады — 26 пытаньняў, якія былі вынесеныя на рэфэрэндум.
Больш за 42 працэнты выбарнікаў узялі ўдзел у галасаваньні 11 сьнежня, адзначаецца ў паведамленьні камісіі.
Пытаньне пра забарону аднаполых шлюбаў атрымала розгалас у грамадзтве, але самым спрэчным пунктам была прапанова аб умацаванні ўлады прэм’ер-міністра за кошт паўнамоцтваў прэзыдэнта.
Апанэнты канстытуцыйнай рэформы ў Кіргізстане лічаць, што з дапамогай гэтых зьменаў 60-гадовы прэзыдэнт Алмазбэк Атамбаеў пасьля завяршэньня прэзыдэнцкай кадэнцыі ў 2017 годзе, плянуе атрымаць кантроль над усёй выканаўчай уладай у краіне і стаць прэм’ер-міністрам.
У адпаведнасьці з заканадаўствам краіны, прэзыдэнт Кіргізстану абіраецца толькі на адзін шасьцігадовы тэрмін, але палітык можа неабмежаваную колькасьць разоў прэтэндаваць на пасаду прэм’ер-міністра.
