Кіраўнік выбарчай камісіі Гамбіі абвясьціў перамогу на прэзыдэнцкіх выбарах кандыдата ад апазыцыі Адаму Бэраў, за якога прагаласавалі больш за 45 працэнтаў выбаршчыкаў. За прэзыдэнта Джамі — каля 37 адсоткаў.
Ях’я Джамі пакуль не зрабіў ніякіх заяваў па выніках выбараў. Чакаецца, што 2 сьнежня ўвечары ён павіншуе свайго суперніка з перамогай і выступіць са зваротам да грамадзянаў Гамбіі. Кіраўнік выбарчай камісіі назваў цяперашні прэцэдэнт «унікальным выпадкам, калі чалавек, які кіраваў дзяржавай гэтак доўга, прызнаў сваё паразу».
51-гадовы Ях’я Джамі займаў прэзыдэнцкую пасаду ад 1994 году. Ён прыйшоў да ўлады ў выніку вайсковага перавароту і зьвяржэньня прэзыдэнта Даўда Кайраба Джавара, які кіраваў краінай ад 1965 году.
Праваабаронцы крытыкавалі прэзыдэнта Джамі за перасьлед апазыцыі, журналістаў і гей-супольнасьці.
Гамбія — найменшая дзяржава кантынэнтальнай часткі Афрыкі (тэрыторыя: 10,4 тысячы квадратных кілямэтраў; насельніцтва: 1,8 мільёна). Атрымала незалежнасьць ад Вялікабрытаніі ў 1965 годзе. Форма дзяржаўнага кіраваньня: ісламская рэспубліка.
